GIANDAM na sa Santo Tomas Municipal Police Station ang pagpasaka og kaso batok sa duha ka indibiduwal nga misibat agi sa kanal sa usa ka quarantine facility sa Santo Tomas, Davao del Norte, Martes sa gabii, Hulyo 21, 2020.
Sumala ni Police Major Frederick Deles, hepe sa Santo Tomas Municipal Police Station, ilang na-rescue ang usa samtang ang usa boluntaryo nga mibalik sa quarantine facility.
“Na-bored na gyud sila and allegedly makigkita sila sa ilang uyab. Mogawas na unta ang resulta sa ilang test, apan kay nisibat sila, basin og naka-direct contact na sab sila ug magpaubos na sab sila sa 14-day quarantine. Giandam napod nato ang kaso nga ipasaka kanila, magdepende sa complainant nato nga mao kining Municipal Health Office, diri,” saysay ni Major Deles.
Dugang impormasyon gikan kang Deles nga usa ka overseas Filipino worker (OFW) ang usa samtang ang usa ka kauban niini usa ka locally stranded individual (LSI).
Migula sa imbestigasyon nga miagi sa kanal sa likod sa Santo Tomas College of Agriculture, Sciences and Technology ang duruha dihang giingong gisundo sila sa ilang mga uyab.
Si Deles nagbutyag sa Superbalita nga mag-atubang og kaso ang duruha sa paglapas sa Republic Act 11332 kun ang Mandatory Reporting of Notifiable Diseases, Health Events of Public Health Concern Act.
“Sa karon, anaa na sila sa atong quarantine facility, nagmahay sa ilang gihimo, imbes makagawas na sila kay pagawas na unta ilang resulta,” dugang ni Deles pinaagi sa telepono Miyerkules.