APRONIANITO F. MIRAMON
Talisay, Santander, Cebu
MIBASUNI sa galamhan ni Michael ang nag-umido nga kasakit. Apan ang tanang pagbasol gihan-ok niya sa kaugalingon. Ulahi na ang tanan usa pa siya makaamgo sa kabulawanon sa pamilya. Karon lang nga miresulta ang pag-abuso niya sa iyang lawas. Kanang magsaguysoy siyag ubo ug mag-agungoy sa atraytis. Bation niya ang tumang pagmahay kanang halos siya makabakod, apan kinahanglan niyang pugson kay walay mapalihog bisan sa pag-init og tubig. Natugkad niya karon ang lingla nga mibitik kaniya niadtong panahon sa iyang kabatan-on.
“Di ba nasayod ka na man kaniadto nga sumpay sa akong pusod kanang akong mga barkada!” banghag ni Michael ngadto kang Joyce dihang misukmat ang naulahi kabahin sa iyang pagka iresponsable. “Sa wala ka pa kabahin na ang akong mga barkada sa akong kinabuhi. Busa wala kay katungod nga moreklamo!”
“Kon di ka makabiya nianang naghingapin mong bisyo, kami si Inday Jaycel ang mobiya!” balos sa asawa.
Gikalipay ni Michael ang maong hitabo. Sa iyang paminaw subra pa ka gawasnon siya karon. Wala nay laing tagan-an sa iyang suweldo gawas sa paglingaw sa kaugalinon. Ug labaw sa tanan walay nay asawang magyawyaw kon dugay siyang mouli nga nakainom.
“Cheers alang sa kagawasan ni Michael gikan sa sayal ni Joyce!” Ang nanakod nga bahakhak ni Tirso mitabon sa tingog sa nagpingkiay nilang mga mug.
“Mas pilion ko pa nga kawad-ag asawa kaysa kawad-ag barkada!” morag nagdiskurso si Michael dayong yarok sa iyang tagay.
“Niadto bitawng nabuntis ko si Julia gidaygan ko gyud dayon siya nga wala sa akong bokabularyo ang pulong kaminyuon,” pasiatab ni Justin. “Wa ko patunto sa iyang hilak-hilak.”
Tungod sa ilang bisyo, wa pa gani sila ma-senyor sitisen, pulos na sila masakiton. Ang kaniadtong mga adlaw sa ilang kinabuhi nga pulos hudyaka, karon gibaslan og mga pag-antos. Gilikay-likayan na man gani sila sa ilang mga igsuon ug kaparyentehan, kay gawas nga tagdunon na wa na say nahot.
“Pangitaa si Joyce ug pangayo niyag pasaylo aron magkauli mo.” tambag ni Ate Carmel niya, apan ang tinuod naglikay kini nga makaatiman ug makagasto kaniya.
“Malipayon na ako kauban sa akong pamilya. Ug giisip ko na ikawng patay sukad sa akong pagbiya!” mga pulong ni Joyce nga daw mahait nga punyal alang kang Michael. “Gikalipay ko kadtong adlawa kay nahimo akong gawasnon gikan sa imong kalampingasan!”
“Bentaha ka, Bay Justin, kay gipangita ka sa imong anak.” Ingon sa mihuot ang dughan ni Michael. “Samtang ako ania, dalaga na si Inday Jaycel apan wala makaila nga ako ang iyang amahan.”
“Unsay maayo ba, uy?” ni Justin nga daw adunay gikalisangan. Dali kining mitago sa likod sa sera sa pultahan sa gubaong balay ni Michael.
“Gipangita ka man kaha sa inyong anak ni Julia nga karon ulitawo na, apan nganong mitago ka man hinuon diha?” ni Michael nga naglibog.
“Nangita lagi nako among anak, Bay, apan dili aron makaila siya kanako kundili iya kong patyon!” ni Justin nga daw nagsalimuang. “Manimalos kuno siya sa gibuhat ko kaniya ug sa iyang inahan!”
(KATAPUSAN)