JOJIE E. OGA-OB
Barili, Cebu
Ang tawo makabuhat og dautan
Dili tungod kay siya dautan
Kundili buot lang niyang hinginlan
Ang espiritu sa kalaay niyang gitan-ogan
Ug tagbawon ang kaugalingon sa kalami
Nga ihatag sa panagsang pagsupak.
Kay bisag ang tawo dako na
Ang bata sulod kaniya magpabilin
Gihapong usa ka bata.
Busa nadayag nganong ang iyang
Espiritu nahisama sa hangin
Kiatan, di mahimutang,
Kanunay nangitag dahon nga
Kasangkilan, kanunay nangitag
Kawayan nga kahuypan.
Apan pagbantay kay kon masubraan usab,
Kini mahimong usa ka mapintas nga bagyo
Kinsa mahimuot nga magsud-ong
Sa gimugna niyang kadaot diin sa katapusan,
Sa higayong mabunal na sa pangpang
Kini molurang ug mopatighulog
Ngadto sa kaugalingong pagkapukan.