DAVAO DE ORO -- Pormal nang napasaka ang kasong murder sa ulitawo nga mipatay sa kaugalingon niyang uyoan pinaagi sa pagmartilyo sa ulo niini didto sa Purok 20, Barangay Casoon, Monkayo.
Ang suspek giila nga si Bonifacio Bermijo Taug, 29, mag-uuma ug molupyo sa nahisgutang dapit.
Sa report nga nahipos sa SunStar Superbalita pinaagi sa pakipaghinabi kang Police Chief Master Sergeant Lucio G. Camasura sa Monkayo Municipal Police Station, nasayran nga ang suspek gipadlak sa prisohan human napatay ang uyoan nga si Armando Manaytay Bermijo, 54, minyo, mag-uuma ug molupyo sa samang dapit.
Gihulagway nga nadugmok ang ulo sa biktima hinungdan nga nigawas ang iyang mata ug nabangag ang likod nga bahin sa ulo.
Nahitabo ang krimen niadtong Biyernes sa niaging semana, Hulyo 17, 2020 sa dihang gibadlong ang suspek tungod kay nagmaoy nga hubog. Apan nasuko sa biktima ang suspek hinungdan sa krimen.
Boluntaryong misurender ang suspek sa nagrespondeng mga barangay tanod ug gitunol ngadto sa pulis.
Ang suspek sumala ni Camasura nakakustodiya na sa ilang buhatan ug niadtong adlaw'ng Lunes, Hulyo 20, 2020 gipasaka na ngadto sa korte ang kasong pagpatay batok kaniya.