Dear Papa Joe,
Ako diay si Carl, 39, minyo, dunay mga anak.
Sa kalisod sa panahon karon, naninguha lang gihapon ko nga maka provide sa akong pamilya nga maora lang og way pandemic. Di ko gusto nga laayon ug kapuyon sila nga bisan inig uli nako gikan sa trabaho ako gihapon halos ang tanan. Iro na lay mosugat nako. Ako pay mangandam sa akong pamahaw.
Inig uli, naa tuoy makaon, pero di mi magdungan sa akong wife kay busy siya tan-aw og salida o Facebook. Sakitan kaayo ko kay ako pay manghugas, di pa magpadug kay hadlok mamabdos nga naa man tay paagi. Karon, ako pay manglaba kay naglain permi iyang lawas. Hangtod nibuto ko ug matod pa niya naburyong na daw siya nga naa ra sa balay.
Ganahan na siya mopauli sa ila pero maluoy lang siya sa among mga anak nga close kaayo nako kay mga gagmay pa. Matod pa niya nga wa na siyay gugma nako dugay na. Sakit pero para na lang sa akong mga anak nag-antos ko. Palihug tambagi ko.
CARL
Carl,
Basin bunga lang sa iyang kapungot mao nasulti to niya nimo. Pero di gihapon maayo kon basihan lang nato ang imong estorya. Basin dako kag gugma anang bayhana mao nga niabuso sad.
Mas maayo siguro nga mag-estoryahanay mo kon makaagwanta pa ka. Huwata nga pwede na makagawasgawas para makapangayo mog tambag sa inyong ginikanan. Sakto ka, pailob para sa mga bata. Pero kon di gyud madala ug wa na gyuy gugma gikan niya, aw, ayaw lang kalimti imong obligasyon, mapaanha man nimo o sa iyaha inyong mga anak.
PAPA JOE
(sa inyong tampo ipadala sa papajoesuperb@gmail.com)