NANGHINAOT ang Filipino basketball fans nga madayon ang teaser sa Cignal TV nga gituohang adunay kalambigitan sa pagbalik sa National Basketball Association (NBA) sa Philippine television.
Sa miaging pipila ka mga adlaw, adunay subscribers sa Cignal TV ang nakabantay nga adunay teaser sa NBA SD cable channel 96 nga nagkanayon: “Stay Tuned For Something Awesome” samtang anaa sa background niini ang NBA logo ug basketball court.
Taodtaod na nga wala gipasalida sa telebisyon sa Pilipinas ang NBA human ma-expire ang kontrata sa Solar Entertainment sa pagpasalida sa NBA games. Tungod niini nawala ang Basketball TV ug NBA Premium TV.
Daghan ang NBA fans nga naghinamhinam ug nangutana kon posible kaha makabalik sa telebisyon ang NBA dinhi sa nasod.
Kagahapon lang nagsugod na sa ilang scrimmage games ang teams alang sa pagpangandam sa NBA season restart karong Hulyo 31, 2020 (RP time) human kini maundang og pipila ka mga buwan tungod sa coronavirus disease (Covid-19) pandemic.
Matod ni Philippine Sports Commission (PSC) commissioner Charles Raymond Maxey, usa ka solid Los Angeles Lakers fan, maayo kini nga balita para sa mga Pinoy nga mahiligon og basketball.
“That’s good. Basketball is our national past time, the sport closest to our heart. Filipinos are dying to see NBA action back on live television,” matod ni Maxey, nga usa pud ka Ginebra Gin Kings fan, sa pagpakighinabi ning mantalaan.
Ang die-hard basketball fan ug organizer sa Cebu Elite Basketball Club nga si Bertoni Salazar nagkanayon nga kon mahibalik man ang NBA games sa telebisyon dinhi sa nasod, ikalipay kini sa mga Pinoy labi na karon nga kadaghanan anaa lang sa balay tungod sa quarantine nga gipatuman tungod sa hulga sa coronavirus disease 2019 (Covid-19).
“Bringing back the NBA on cable TV would mean the world to all Filipino basketball fans. After all, we are one of the most die-hard NBA fans in the world and NBA League Pass is not accessible or affordable to all regular Filipino NBA fans,” matod ni Salazar.
Dugang niya nga lahi ra ang fan base sa mga Pinoy kon anaa sa telebisyon ang NBA.
Si fitness coach ug NBA fan Alan Choachuy miingon nga daghan ang naghinamhinam karon sa NBA ug makatabang kini sa pagminus sa negativity sa mga tao tungod sa pandemya.
“For sure excited gyud kay sa kadaghang negativities ron, we have the NBA to bring us positive outlook,” matod niya.
Adunay 22 ka NBA teams karon nga anaa sa ESPN Wide World of Sports complex sa Disney World, Orlando, Florida.
Ang tanan mga sakop sa teams gibutang sa “bubble,” diin ang players, coaches ug staff lang ang makasulod.