NAHUMAN na ang desinyo sa tukurong Lapulapu Shrine sa Barangay Mactan, dakbayan sa Lapu-Lapu isip tipik sa pagsaulog sa ika-500 ka tuig nga kasumaran sa Kadaugan sa Mactan sa Abril 27, 2021.
Ang proyekto usa sa tulo ka flagship nga proyekto sa National Quincentennial Committee (NCQ) sa nasod, matod ni Dr. Rene Escalante, chairman sa National Historical Commission of the Philippines (NHCP) sa gipahigayong webinar niadtong Martes, Hulyo 21.
Ang laing flagship project sa NCQ mao ang Museum of Philippine History sa Butuan City ug ikatulo mao ang mga historical marker nga moabot sa 32 kabuok lukop nasod.
Ipahimutang kini sa mga dapit nga naagian ni Ferdinand Magellan 500 ka tuig ang nakalabay ug usa niini ibutang usab sa Mactan Shrine.
Ang pagpatuman sa proyekto sa dakbayan gitambayayongan sa Lapu-Lapu City Tourism, Cultural and Historical Affairs Commission TCHAC nga gipangulohan sa Lapu-Lau City First Lady Cindi King Chan.
Base sa desinyo ang atop sa Lapulapu Shrine porma og sakayan.
Pagpasabot ni Escalante nga ang sakayan maoy simbolo sa kaagi sa panagat ug kultura kaniadto.
Ang wala ug tuo nga bahin sa building butangan ug mga house gallery ug nagkadaiyang function room.
Ang tunga sa building usa ka dakong hallway gikan sa atubangan paingon sa luyo diin mahimutang ang estatwa ni Lapulapu sa tunga.
Ang atubangang bahin sa shrine mao ang usa ka stage samtang ang likod mao ang view sa dagat, mangroves ug reclamation area.
Sa pagpili og nindot nga monumento ni Lapulapu nga ibutang sa shrine, ang NCQ mopahigayon og Lapulapu National Monument Design Competition diin ang mananaog makadawat ug P300,000.
Samtang, ang marker nga ibutang usab sa shrine butangan og globe sa babaw niini samtang butangan ug basahon ang atubangan niini aron masabtan ang nahitabo 500 ka tuig ang nakalabay sa naasoyng lugar.
Plano sa NCQ nga mahuman kini karong tuiga aron ma-turnover sa mga nagkadaiyang lugar sa nasod alang sa selebrasyon sunod tuig. (GCM)