MOKABAT sa 45.319 ka kilo sa shabu ug 573 ka kilo sa marijuana nga balor ang tanan og P374.7 million nasakmit sa kapulisan sa Central Visayas sud lang sa 100 ka mga adlaw bisan sa coronavirus disease (Covid-19) pandemic.
Mao kini ang kinatibuk-ang nasakmit sa kapulisan sa rehiyon sukad nangatungdanan si Police Brigadier General Albert Ignatius Ferro isip hepe sa Police Regional Office (PRO) 7 niadtong Pebrero 8, 2020.
Sa data nga gipakita ni Ferro, nakahimo silag 1,961 ka anti illegal drug operations, diin 3,024 ka mga drug suspect ang ilang nasikop, 251niini mga high value individual nga pulos napasakaan og kaso sa korte.
Nakasakmit silag 45.319 ka kilo sa gituohang shabu nga mobalor og P306 million samtang 573 kilos usab sa pinaugang marijuana nga adunay balor nga P68.7 million.
Gipasabot sa heneral nga bisan ning panahon sa pandemic, padayon ang pagkatap sa illegal nga drugas sa mga dapit sa Central Visayas ilabi na sa dakbayan sa Sugbo hinungdan nga di sila mohumong sa ilang gubat batok niini.
“Ang drugs talaga, for the time being, bisan naay Covid, they are still transacting illegal drugs. Remember sa Luzon, dagko tong nakuha nila na mga billions in 700 kilos, in 300 kilos. So meaning, talagang the problem of illegal drugs still exist. So we need to be vigilant na di siya undangon ang effort sa illegal drugs even with this time of pandemic,” matod ni Ferro.
Atol sa pagpaubos sa enhanced community quarantine (ECQ) sa Sugbo, daghan silag nangadakpan nga suway nga mopalusot sa illegal nga drugas diha sa mga quarantine checkpoint sa pagtuo nga dili sila madakpan.
Sa dihang nabantayan na ang lihok sa mga durugista, mihimo silag laing pamaagi nga nahibaw-an usab dayon sa mga pulis tungod sa mga impormasyon nga ilang nadawat gikan sa komunidad.
Matod ni Ferronga dakong hagit kanila ang pagkuyanap sa Sars-CoV-2, nagdala sa coronavirus disease sa tibuok kalibutan.
Moabot sa kapin 300 sa iyang mga sakop ang nataptan sa maong virus, upat ang nakalas.
Bisan pa niini, niubos og 50 porsiento ang walo ka focus crimes tungod sa suporta sa publiko sa kapulisan sukad niadtong Pebrero.
“Yes, it was a very trying time for all of us here in Central Visayas. But with the cooperation and overwhelming support of the community of mga Sugboanon, we’re able to come up with a better performance. Another thing nga accomplishment nato, the 8 focus crimes went down. Medyo maganda yung percentage even without the quarantine period, talagang the crime was also going down,” matod ni Ferro.
Gawas sa illegal nga drugas, lakip sa nasakmit sa kapulisan ang dul-an sa 500 ka loose firearms gikan sa mga residente sa bukid.