ONLINE ang pag-book, money remittance na ang pagbayad ug gamitan na og modernong device nga maoy butangan sa tanang mga impormasyon ang matag turista nga mosuroy sa Lalawigan sa Sugbo.
Mao kini ang bag-ong mga paaagi nga himuon sa Kapitolyo sa pagbukas na unya sa tourist sites ug resorts human si Cebu Governor Gwendolyn Garcia nimando sa pagpabalik na sa turismo sa lalawigan.
Si Garcia niluwat sa Executive Order (EO) 20-A sa Hulyo 23, 2020 nga iyang gipahibawo sa usa ka press conference sa Kapitolyo. Nalatid sa EO 20-A ang mga lagda ug giya nga pagasundon sa kalungsoran sa Sugbo.
Alang sa mga mosuroy sa Probinsya, gikinahanglan ang pagparehistro pinaagi sa online portal sa Probinsya sa Sugbo nga gidumala usab sa mga buhatan sama sa Provincial Tourism Office (PTO), Department of Tourism (DOT), Department of Trade and Industry (DTI), Department of Health (DOH) ug Cebu Police Provincial Office (CPPO).
Ang maong paagi gibuhat aron malimitahan ang mosuroy ug masuta daan ang buot bisitahon sa turista.
Sa maong portal, mahibaw-an usab ang guidelines, mga angay nga dad-on ug andamon sa turista.
Samtang ang paagi sa pagbayad iagi sa money remittance center.
Kon makompleto na sa pagrehistro, hatagan ang turista og radio-frequency identification (RFID), usa ka modernong galamiton nga ang confirmation codes ug tanang mga impormasyon sa usa ka turista nabutang sama sa iyang pangduawon nga mga dapit.
Ang RFID dunay duha ka components: tags ug readers. Ang tags mopadala sa tanang mga impormasyon ngadto sa reading device.
Ang tags nga ipagamit sa Lalawigan sa turista usa ka pulseras nga isul-ob kanunay.
“This way masabtan ang tanan nimo nga whereabouts ug ang tanan nimo nga contacts lakip na usab ang pag carry sa imong cashless payment nga ma-loadan kini ug e-wallet amount”, matod ni Garcia.
“Part na na sa package. They have to pay for it and they have to wear it also all the time unya ila nana, “ matod sa gobernador.
Sa sunod semana, gilauman nga mobukas na ang labing unang tourism activity nga mao ang whaleshark watching sa lungsod sa Oslob.
Gawas sa whaleshark watching, lakip sa mahimong buksan ang sightseeing, zipline adventure, parasailing, ATV riding, trekking, mountaineering, spelunking, pagbisita sa mga museum ug uban pa.
Niining tanan, gikinahanglan nga mosubay gihapon sa guidelines ubos sa modified general community quarantine (MGCQ).
Kini sama sa 50 porsyento nga operating capacity, pagsul-ob og mask ug protective gear aron malikay sa pagtakod sa coronavirus disease (Covid-19).
Lakip usab sa kamandoan ni Garcia mao ang pagpamutang og disinfecting areas ug pagpamalit og disinfecting equipment alang sa paghinlo sa palibot ug mga kagamitan sa tourist actitives.
Gipasabot ni Garcia nga ang pagbukas sa turismo dili pagpasabot nga makabuot na sa kaugalingong lakaw ang mga turista. Ang pagbukas sa turismo gibuhat aron makabangon ang mga establisimento, restaurants, hotels ug mga empleyado nga labihan na nga naapektohan sa krisis dala sa Covid-19.
“Pila na intawn ni sila ka buwan nga nag-antos. Kinahanglan nato sila nga tagaan og paglaom nga adunay kahayag taliwala niining kalisod,” pagpasabot sa gobernador.
Sa samang adlaw, giluwatan usab ni Garcia ang Executive Order (EO) 20-B nga nag-umol sa Provincial Tourism Task Force (PTTF) nga maoy mo monitor kon compliant ba ang mga establisimento sa kalihukan ug pamaagi sa turismo. (ANV)