TULO ka mga magsuon nangalumos sa alas 10:30 sa buntag sa Biyernes, Hulyo 24, 2020 sa Mag-alambak River sa sitio Mag-alambak, Barangay Mantalongon, lungsod sa Dalaguete, habagatang Sugbo.
Ang managsuon gilangkuban sa duha ka mga babaye nga nagpangidaron pag 11 anyos, 9 ug ang manghod nga 4 anyos nga lalake.
Matod ni Police Corporal Jem Vincent Pacaldo, desk officer sa Dalaguete Police Station, nga mga pasado alas 9 sa buntag, niuban ang lima ka mga magsuon sa ilang apohan nga si Valeriano Betcher Besin,72, sa umahan niini nga naa ra usab sa maong dapit.
Giingong molabang pa sa sapa atbang sa ilang balay sa di pa ang umahan sa ilang apohan.
Pasado alas 10 sa buntag, nananghid ang 11 anyos sa iyang apohan nga mouna pagpauli sa ilang balay ug mohapit sa pagpangaligo.
Gibauran pa kini sa apohan nga di mosawom sa lawom nga bahin sa sapa nga gihulagway niini nga di ra dako.
Apan sa padayon nga pagpangaligo, ang tulo nangaanod sa lawom nga bahin sa sapa.
Ang laing duha ka mga igsuon nga nagpangidaron pag 7 ug 5 anyos nga pulos mga babaye, ningdagan paingon sa ilang apohan aron mangayo og pakitabang labot sa nahitabo sa ilang maguwang ug manghod.
Dali unta nga mitabang ang apohan, apan sa iyang pag-abot, naglutaw na ang 9 anyos samtang ang duha naunlod kini sa tubig nga adunay giladmon nga lima ka tiil.
“Ang kining 9 years old maoy unang nakuha. Kining duha milundag man ang lawas ani nila. Gitabangan nalag kuha sa mga taga rescue nato nga na recover ra sad dayon,” matod ni Pacaldo.
Gihulagway ni Pacaldo nga di dako ang sapa.
Gani matod niya nga gamay ra ang tubig niini, apan adunay bahin nga lawom.
Modako lang ang sapa kon kusog ang bunok sa uwan sa bukid, apan kung linaw ang panahon, hinay lang ang dagayday sa agas sa tubig.
Atol sa pagpangaligo sa lima ka magsuon, walay tawo sa palibot nga makakita unta sa insidente ug maluwas pa unta kini.
Way nakita nga foul play ang kapulisan sa Dalagute tungod kay aksidente ang nahitabo sigun sa resulta sa imbestigasyon. (AYB)