MATOD sa mga eksperto mataud-tauran pa una mamugna ang vaccine nga mobatok ining Covid-19 maong hinayhinayon na lang nato pagdawat ang kamatuoran, kay wa man tay choice, nga magpuyo uban ni Corona.
Unya kay di naman mapugngan ang pagkaylap niini sa tibuok kalibutan, naka desisyon ang mga awtoridad sa Japan paghimo og New Life Model nga nahimong sumbanan sa mga Hapon sa ilang tunghaan, eskwelahan og sa ilang inadlaw-adlaw nga pagpuyo.
Ako kining ipa-ambit ang ilang gipang-himo kay praktikal kaayo ang estilo.
Kining tulo maoy pinaka importante nga ilang gibalik-balik pagpahimangno sa tanan: pagsul-ob og mask, pagpalayo sa usag-usa ( 6 feet apart) kung makig-kukabildo, og paghugas sa kamot gamit ang sabon.
Ang ilang mga bata gipang-ingganyo pagduwa sa gawas apan distansiya gihapon.
Gibalik-balik pagpahimangno nga kung making-kukabildo, di magduol ang nawong (face to face) aron di malisikan sa kagaw kon droplets.
Inig abot sa balay, pag-ilis gilayon, panghilam-os o kaligo aron matangtang ang mga kagaw nga namilit.
Kanunayon ang pag-hugas labi na og nagamit ang kamot sa paglamano o hikap. Makatabang kung mag-gloves panahon nga mangumpra o makig-estorya aron di matintal paghikap sa nawong.
Bansaya ug anara ang kaugalingon sa pagpamalit on-line kay mas luwas kini itandi kung mo-adto sa tindahan para mamalit. Apan kung di gyod mapugngan, pangumpra sa oras nga gamay ra ang mangumprahay. Ayaw sab pagsegi og hikap-hikap sa mga baligya. Kung duna kay intensiyon pagpalit, pagpili usa gamit ang mata una pa mo punit o palit sa napilian.
kung magsakay og pampublikong sakyanan, tak-uma ang baba unya ayaw pagsige og tabi. Gani, gi ingganyo ang tanan paggamit og besiklit o ba kaha paglakaw kay gawas nga way gasto, exercise sab kini.
Kung ugaling mag meeting, imbis magpundo-pundok, mag-video conference na lang aron layo sa takod.
Suwaya og panrabaho nga naa ra sa balay (work-from-home) kay mao na kini ang bag-ong estelo sa pagpanrabaho.