USA ka tawag sa cellpone maoy nipukaw ug nakapakugang nako niadtong Hulyo 9, 2020.
Walay espisyal nga selebrasyon. Wala usab ko nakadaog og milyones sa raffle. Apan kini nakapausab sa akong kinabuhi.
Ang tawag gikan sa lokal nga kagamhanan sa Dakbayan sa Lapu-Lapu nga nagkompirmar nga nagpositibo ko sa coronavirus disease (Covid-19).
Unsay sinugdanan sa sakit? Unsay kasinatian?
SINUGDANAN
Nagsugod ang tanan sa simpleng gahi nga ubo nga wala nako panumbalinga tungod kay motumaw ra kini inig mata nako sa buntag ug matag human og kaon.
Nitumar ko og Carbocisteine, usa ka basic nga tambal alang sa ubo, apan wala nawagtang akong gibati ug nakasinati na usab ko og sakit sa lawas o body aches.
Wala ko naghunahuna nga aduna koy sintomas ug natakdan ko sa Covid-19 kay anaa koy rason.
Gawas sa akong trabaho isip sakop sa media, nagsugod ko og sideline og supply og Superbalita Cebu ug SunStar Cebu newspapers sa Lapu-Lapu City sa pagsugod sa lockdown ug niadtong katapusan sa Hunyo, kanunay ko mabasa sa matag kaadlawon nga uwan tungod kay motorsiklo akong gamit sa pag-deliver.
Nagtuo ko nga fatigue o kakapoy akong gibati apan nagmabinantayon ko sa temperatura sa akong lawas tungod kay nagsugod nako og kahadlok nga makasinati og hilanat.
Sa matag kuha sa akong temperatura sa opisina gamit ang thermal gun, mahupaw ang akong pamati kon normal ang resulta tungod kay sa akong hunahuna maayo pa akong panglawas.
SINTOMAS
Alas 2 sa kadlawon sa Hunyo 29, naabot ang akong gikahadlokan, nakamata ko nga nagkurog sa katugnaw ug sa pagkuha nako og temperatura, 37.9 degrees Celcius ang mitala sa thermometer.
Dali ko nga nag-isolate sa balay ug nitumar og paracetamol. Ang akong mga panginahanglanon sama sa pagkaon ug tubig ibutang ra sa gawas sa pultahan ug aduna koy kaugalingong kubyertos ug baso.
Giawhag ko sa akong pamilya nga magpa-swab test apan nagdumili ko kay wala na nibalik akong hilanat tibuok adlaw gani naulian ang akong pamati.
Kaadlawon sa Hunyo 30, nakamata ko sa kasakit sa akong lawas inubanan sa ubo ug grabe nga kalipong apan normal ra ang akong temperatura.
Di ko mahimutang nga maghigda kay nagsakit ang akong lawas ug di usab ko makalingkod ug barog og dugay tungod sa kalipong.
Nakadesisyon ko nga mokontak sa lokal nga kagamhanan sa Lapu-Lapu aron magpa-swab test ug gibisita ko sa mga health worker pagkagabii.
Sugod pagkahapon hangtod nahuman ang adlaw, anaa sa 38 degrees Celcius ang akong temperatura diin niabot sa 38.8 ang labing taas nga akong natala.
Sa mga nisunod nga adlaw nigrabe pa ang akong mga gipamati gikan sa ubo, sakit sa lawas, pagkawala sa panlasa, basa nga hugaw, pagsuka hangtod sa hilanat nga niaabot pa og 39 degrees Celcius ug kalipong diin literal nga nagtuyok ang akong panan-aw.
Akong mahulagway nga susama og giduwaan ang akong lawas kay adunay mga higayon nga makamata ko nga maayo ang akong pamati apan inig hapon ug kaadlawon moatake na usab ang sakit.
Kon hisgutan ang pagkaon, taman ra sa duha ka kutsara nga kan-on ug sud-an ang akong mahurot ug human sa pipila ka minuto ako ra usab ning isuka. Mao usab sa tubig kon masobrahan dayon ra usab ko og suka.
Adunay mga adlaw nga wala koy tulog tungod kay halos kada oras nako magsuka.
Gawas sa makaluya sa lawas ang maong mga kasinatian, mas grabe ang epekto niini sa akong pangisip gani niabot pa sa punto nga gusto nako mupahuway sa kahangturan.
Sa kalisud sa akong kahimtang dili nako kalitok sa akong mga pag-ampo ug taman nalang ko sa pagsampit sa kahitas-an naghinaot nga maluwas.
Nadugay wala na ko nahadlok para sa akong kaugalingon, nabalaka ko sa akong pamilya ug fiancee nga maoy akong mga close contact. Walay adlaw nga wala ko kulba-i nga basin matakdan sila.
Lisud pamalandungon nga basin ako ang magdala og sakit sa akong mga minahal sa kinabuhi. Sa akong hunahuna, bahala nalang nga ako ang maigo basta luwas lang sila.
Pagrekober
Sa ika-unom nga adlaw gikan ko gihilantan, nikonsulta ko og doktor online. Gitaagan ko og duha ka antibiotics ug inhaler para sa baga.
Nag-anam og kawagtang ang akong mga sintomas sugod sa ikapito ug walo nga adlaw. Unang nawala ang akong hilanat apan ang sakit sa lawas ug kalipong maoy nakapalisud sa akong pagrekober kay gilimitahan niini ang akong paglihok.
Naghinayhinay usab og balik ang akong panlasa apan dili susama ang gana sa pagkaon sa wala pa ko nasakit.
Niadtong Hulyo 13 o ika-14 ka adlaw gikan sa akong pagpa-swab, gibisita ko og balik sa mga health worker aron ipaubos sa test.
Human sa duha ka adlaw nigawas ang resulta ug gipahibawo ko nga nakarekober ko sa Covid-19 ug dili nako makatakod.
Sa akong pagrekober, nagpabilin gihapon nga dakong pangutana kon diin ug kanus-a nako nakuha ang sakit.
Mga kaamgo
Nakaamgo ko nga ang Covid-19 dili susama kahadlok sa kon unsa man gani ang atong madunggan bahin niini. Ang pagpositibo sa maong sakit dili usa ka death sentence.
Lahilahi ang kasinatian sa matag tawo nga magpositibo, adunay mga walay sintomas ug tinuod usab nga makamatay kini hilabi na niadtong adunay komplikasyon sa laing sakit.
Sa akong kasinatian, napahimug-atan sa mga pagsuway sa pangisip nga aspeto ang kalisud sa panglawas. Apan masulosyonan kini pinaagi sa saktong suporta.
Sa panahon nga wala koy kusog sa panglawas, pangisip, ug spirituwal, ang akong pamilya ug fiancee maoy naghatag og paglaom ug nagpabarog nako og balik.
Dili masukod ang ilang sakripisyo sa pag-atiman ug pag-ampo nako hilabi na sa pag-antos nga ma-isolate. Ug kaluoy sa Ginoo wala sila matapdi sa sakit.
Napildi ko sa mga pagsuway niining Covid-19 apan nagmadaugon ko tungod kay kabubut-on sa kahitas-an nga maayo ko.
Mapasalamaton ko kay bisan paman nga niyukbo ko sa sakit, gitagaan gihapon ko sa Ginoo og bag-ong kinabuhi.