KON mobalik na ang bola ug operasyon sa suertres lotto sa Central Visayas sa Agusto 4, 2020, seguruon sa kapulisan nga ipatuman ang minimum nga health protocol.
Kay mangabli na ang mga lotto outlet, mag face-to-face na ang mga in-charge ug mamalit og tiket, gikinahanglan ang pagpatuman sa minimum health protocol.
Tungod niini, pakigtagboan ni Police Regional Office 7 chief Brigadier General Albert Ignatius Ferro ang kadagkoan sa Philippine Charity Sweepstakes Office (PCSO) sa Central Visayas sa di pa mobalik sa ilang operation sa Agusto 4 alang sa pagtuman sa minimum health standard taliwala sa nagpadayon nga pagsaka sa mga kaso sa coronavirus disease (Covid-19).
Tungod kay adunay face-to-face ang pagpataya sa numbers game sa PCSO ug ang kaso sa Covid-19 sa Dakbayan sa Sugbo taas pa, kinahanglan gihapon nga ipatuman ang social distancing ug uban pa.
Matod ni nga kinahanglan nga sa di pa hingpit nga magsugod sa operation ang PCSO, ilang sabutan ang pagpatuman sa minimum health standard.
“We will be asking the minimum health standard na dapat nilang ipadayon because we should. With that, we still protect our people na di matakdan ba,” matod ni Ferro.
Nipahibawo na ang PCSO pinaagi sa ilang chairman nga si retired Police Colonel Royina Garma nga mobalik na ang ilang operation bisan pa man sa kaso sa Covid-19 sa nasud human mouyon ang buhatan sa Presidente.
Tungod niini, ang PRO 7 nangandam na aron mabantayan ang pagtumaw sa illegal nga sugal nga posibling mosiaw nunot sa pagbalik na sa numbers game sa PCSO.
Dugang ni General Ferro nga sukad sa iyang paglingkod gihingusgan na niya ang kampanya batok sa bisan unsa nga matang sa illegal nga sugal sa tibuok rehiyon.
Sulod sa 100 ka adlaw nga pamunoan sa PRO 7, nakasikop na ang kapulisan og 3,465 ka suspek sa 1,385 ka operations diin moabot sa P486,000 ang ilang nasakmit. (AYB)