Talento: Embrace it!
HELLO, mga kahigalaan. Musta po? Ang ulanon nga panahon ang mas nagpabugnaw sa palibot apan dili sa mga nagdilaab nga gibati sa pipila kanato, dili ba?
Dili unta nako gustong hisgutan kining mahitungod sa Kapamilya network kay nagtubo pod ko nga nagpanubay sa daghang mga palabas niini.
Daghan pod kog naserbisyohan kanila kaniadtong media coordinator pa ang akong trabaho sa Corporate Communications department sa Anflocor.
Sa pagkatinuod, ginaapil nako ang ilang isyu sa mga pag-ampo kay sa panahon sa pandemya dili lalim nga makulban og kaldero, higala.
My heart goes to the ordinary employees of ABS-CBN.
Katong mga taas og ranggo; morag daghan pa silag pundo ug makapangita pa silag laing pagkakitaan seguro.
Sa hisgutanan sa ABS-CBN, unta matagaan silag prangkisa apan dili tungod nga walay bayolasyon ang network kun di plantsahon ang problema niini.
Dili man ko abogado no pero ningtan-aw gayud ko sa mga hearing sa kongreso. Sa kasamtangan (walay apil ang sa una), 67 ang aktibong kaso sa paglapas sa labor laws.
Dili pod ko accountant apan sa hearing mokabat kuno sa P1.2 bilyon nga kantidad nga nawala sa atong gobyerno kada tuig tungod sa tax avoidance o transakyon sa ilang network nga mapaubos ang buwis nga ilang bayran.
Ang usa gayud nga nakapakurat kanako mao ang buwis nga gibayran sa GMA 7 nga sa tuig 2017 nga ningkabat sa P1.09 bilyon samtang sa ABS-CBN nga nag-una og pinakadako nga network kay P421 miyones lang.
Again, dili ko accountant, bulok pod kog Math pero morag dili gayud ni namao. Gani katong 2018, P1.08 bilyon sa GMA 7 samtang naggamit sa tax credits ang ABS-CBN.
Wala ko nagitag sayop sa kompanya, ning ingon lang ko nga dili kita magpakabungol ug buta. Ang mali-ihusto aron mahimong han-ay ang negosyo ug pagpanarbaho ilabi na nga liboan ang apektado.
Ingon pa ni Carlos Munda, nga agalon nako kaniadto, mamahimo ra daw bisan mali atong gibarogan basta anaa kitay baruganan.
Kintahay, bawal manigarilyo kay nasayod ka nga makadaut sa lawas apan nanigarilyo gihapon ka kay imong gusto kay makalingaw nimo ug imo pod nga gasto. Imong katungod ug ikaw magbuot bisan makadaut.
Seryoso, sa personal nakong pagtan-aw, naa gayud mali apan hatagan unta og higayon nga tarungon kini. Dili ko anti-ABS ha, apan sa tan-aw nako dili nato basulon ang kongreso, si pangulo (PRRD) o gobyerno sa maon desisyon. Ngano? Kay kini gitugot sa Ginoo ambot pod kung ngano.
Finally, "embrace it" kung gakson nato ang atong kasamtangang sitwasyon kay ang Diyos ang nagtugot niini. Basin diay lain na pod ang tawag Niya kanato. Basig laing dalan sa kaayohan ang giandam sa Ginoo busa dili ta modukot sa kasamtangang sitwasyon nato.
Dili kita mahimong instrumento sa kagubot kay samot atong nasud madaut. Pili sa imong baruganan (sakto man o dili -pero mas nindot nga sakto) ug barugi kini nga dili makadaut sa imong isig-kaingon. Ang atong mga mulo; sa Ginoo nato ipaabot, ug dili pinaagi sa kagubot. Kasabot?