DAVAO DE ORO -- Anaa na sa luwas nga kahimtang ang sakop sa Philippine National Police nga naangol sa gisakyang motorsiklo human nadasmagan ang iro didto sa Provincial Road sa Purok 2, Barangay Andili, Mawab.
Ang biktima giila nga mao si Patrolman Bernadeth U. Nillas, 33 anyos, nadestino sa Davao De Oro Operation Section ug molupyo sa Mangga St., Tugbok, Davao City.
Subay sa report, nasayran nga ang biktima sakay sa gimanehong kolor itom Honda XRM nga naay plaka nga 1101-506149, naglabigar sa dalan gikan sa Nabunturan padung sa Barangay Andili, Mawab.
Apan pag-abot sa dapit kon asa nahitabo ang insidente, aksidenteng nadasmagan sa maong pulis ang iro nga kalit lang mitabok sa dalan hinungdan nawad-an siya og kontrol sa manobela ug nalimbuwad.
Matod ni Police Senior Sergeant Silvestre B. Cañete Jr., naospital human makahiagom og pangos ug mga bun-og sa lawas ang pulis.
Hinuon, nakagawas na kini sa Mawab Community Hospital human ang tulo ka adlaw.
Nanawagan si Cañete ngadto sa mga nanag-iya og iro nga unta di tugtan nga makagawas kini sa kadalanan subay sa ordinansa nga gimugna sa lungsod.