HANGTUD karon, di pa madawat sa usa ka Sangguniang Kabataan (SK) Chairman sa Barangay Maa, Talomo District, Davao City nga siya nalatigohan sa "Bunal Squad" alas onse sa gabii niadtong Martes.
Nailhan ang SK Chairman nga si Vic Lourenz Pantinople.
Sa post sa dxGM Super Radyo Davao sa ilang FB page, gisaysay nigawas sila sa ilahang panimalay atong gabhiona, kauban ang mga higala nga sila Jomell Uyanguren, 21-anyos, ug Jarry Masayao, 21-anyos aron sugaton ang gi-order nga pagkaon.
Apan, kalit lang matud pa mibutho ang tulo ka motor nga adunay mga backride ug dunay dalang mga pangbunal dayong latos ngadto kanila.
Reklamo ni Pantinople nga unta nangutana ang maong mga lalaki kung nganong anaa sila sa gawas ug wala namunal dayon.
Gibutyag ni Pantinople sa Super Radyo nga guma ang gigamit sa paglatos kanila.
Giingong wa pay helmet ang maong mga lalaki, apan gipangtaptapan ang ilahang mga dagway rason nga wala kini nilanailhan o namay-ungan.
Nagkanayon si Kapitan Pacito Cañete Jr. sa Super Radyo nga iyahang nakasab-an si Pantinople kung nganong migawas pa bisan curfew na.
Gibutyag sab ni Cañete nga sa balay sa higala natulog ang maong SK chairman didto sa Palma Gil Compound.
Nagtuo si Cañete nga posible usab nga adunay nakaaway silang magbarkada sa pikas barangay.
Kagahapon, wala na midugang sa paghatag og pamahayag si Pantinople ug miingon nalang nga buot na niyang mahusay ang nahitabo.
Kahinumdoman nga sa miaging tuig, na-trending sa Dakbayan sa Davaoang pagpamunal sa mga naka-motor nga nagdala og latigo ngadto sa mga menor de edad nga anaa pa sa gawas sa dis-oras sa kagabhion.