ADUNAY mga higayon nga masuwayan kon hangtod asa ang imong pagtuo ug pagsalig sa Labaw nga Makagagahum gumikan sa mga problema ug hagit sa kinabuhi.
Apan ang imong pagtuo ug pagsalig sa kahitas-an, mao usab ang molabang nimo aron madawat ang butang o blessing nga imong gipangamuyo.
Sama sa magtiayong Paul Jhon ug Amaryllis Villarmia nga wa mobuhi sa ilang pagsalig ug pagtuo sa Ginuo ug padayong nanalangin niini.
Niadtong Hulyo 21, 2017, usa ka himsog nga batang babaye ang ilang nadawat nga blessing.
Dili lalim ang naagian sa magtiayon kay nipaubos og pipila ka ultrasounds ug inom og mga tambal si Amaryllis kay maglisod kini og buntis.
Matod niya, emotionally, psychologically ug financially nga kalisod ang nahatag niini ngadto nila sa iyang bana.
Human sa pipila ka buwan nga pagbalikbalik og buhat ug pagsuway sa maong mga pamaagi aron mabuntis si Amaryllis, nihunong sila.
Paghunong nila og usa ka buwan, namabdos si Amaryllis.
Apan dili sayon ang iyang pagsabak kay dunay na-develop nga myoma sa iyang uterus.
“I was internally bleeding in uterus, which prompted my OB to prescribe me Duphaston and other pills pangpakapit. I had to be in bed rest for almost a month. I had to stay home and get some time off from work,” paambit ni Amaryllis.
Human sa duha ka buwan ug sa way hunong nga pag-ampo sa Birhen sa Regla, Señor Sto. Niño ug novena ngadto kang St. Raymond Nonnatus, na-over power sa pagtubo sa fetus ang iyang myoma.
Wala na siya nag-bleeding ug nakabalik na siya og trabaho.
Si Amaryllis ang information officer sa Department of Education sa Central Visayas.
Ang ilang anak ginganlan nila og Pria Amaris.
Niadtong Hulyo 21, 2020, ilang gisaulog ang ikatulo nga kasumaran sa adlaw nga natawhan sa bata.
Lamian nga pagkaon sama sa lechon baboy, bam-i ug cakes ang gisalosalohan sa selebrasyon.
Tungod kay naa pa ang krisis sa Covid-19, gipanghatdan nila og pagkaon ang ilang mga kabanay sa Barangay Labangon, Lahug ug Mabolo sa siyudad sa Sugbo.
Nipaambit usab sila sa ilang mga silingan.
Gidugang ni Amaryllis nga ang orihinal nila nga plano kay mag-donate og packed food sa mga batang libudsuroy, apan wa madayon gumikan sa Covid-19 pandemic. (SCG)