SUKAD nagsugod ang pandemic, wa na ko makasaka og bukid. Busa, taudtaud nang wa na ko maka cardio exercise taliwa sa pagsige og kaon og tam-is ug tambok. Wa nay diet diet basta mokaon kon unsay naay sa lamesa.
Bitaw, mao na ang nahitabo nako sa pagsugod. But kinahanglan usab diay nga di palabihan ang gana kay nikalit kog dakog balik. Wa hinuon moabot og 10 pounds but niburot kog balik. Kaluoy sa Ginuo wa moabot niadtong panahon nga grabe ko ka dako nga nitimbang kog 180 pounds. Grabe ka kutas.
Apan ang tanan disiplina lang. Unya ubanan sab og kakugi sa imong kaugalingon. Kay naa na man ta karon ubos sa modified enhanced community quarantine (MECQ), mahimo na ang outdoor exercise. Bisan ang pagpamalit gani mahimo man nga simple kaayong exercise. Kon duna kay biseklita nga dunay carrier, maayo kaayo. Magsikad kang mamalit. Seguroa lang nga magdala kag lock sa imong bike aron di ni mabitad og laing tawo.
Bisan ang simple nga paglakaw, basta na lang kay dala nga pass nga naka schedule anang adlaw, maayo na kaayo. Pag brisk walk aron pagsunog og calories sa imong lawas. Ang brisk walking, labina sa lahi-lahi nga terrain, naay patag ug tungason, makatabang kaayo sa panglawas, matod sa health experts. The more ka nga mo-exert og energy, the more calories you burn. Ug maayo kaayo na.
MIMAHAL
Niadto pa ming katapusan sa Disyembre sa akong higalang negusyante og biseklita nga si Jay Garganera. Nakalugar ko og bisita niya kagahapon, Sabado. Naikag ko pagbisita kay nakakita ko sa mga display sa iyang shop nga naa ra sab sa ilang balay.
Akong nahibaw-an ni Jay nga nihit na sab ang folding bike shipment gikan sa Japan tungod kay ato na kini sa ubang nasod sa Asean. Unsaon man gud ning mga Pinoy, grabe ka pilian. Naay supplier nga misugot but medyo mahal sab ang presyo. Iya ning gibaligya og tag P5,500 matag usa ka unit.
SIMTOMAS
Sa ako nang giingon, ang pagpanaghan sa two-wheeled nga mga sakyanan sa dalan simtomas sa mas dakong problema nga mao ang trapiko ug kakuwang sa epektibong mass transportation. Kon masulbad ang trapiko ug duna nay mas maayong mas transportation, kaanindot na. Bisan ako, di na ko magdalag scooter kay kalami man nga motagpilaw ka samtang nagpaingon sa opisina. Di ba?