Binasi sa 1 Hari 3:5, 7-12; Salmo 119; Taga-Roma 8:28-30; Mateo 13:44-46
PAGPANGILAD ang gitawag nga “pyramid scheme”. Usa kini ka paagi sa pagpangwarta diin saaran ug makakuha og dako kaayo nga tubo ang usa ka “investor” gikan sa nagpasiugda sa maong panglingla. Makadawat gyod ang nag-unang niapil tungod kay ang mga sunod nga miapil maoy mingbayad sa iyang nadawat nga abot. Apan walay tinuoray nga bili sa ekonomiya ang nahatag niini kay walay singot ug pagbudlay nga gikinahanglan sa tinuoray nga negosyo. Laway lang ang puhonan.
Daghan na kaayong “pyramid scheme” ang nahitabo, apan daghan lang gihapon ang mosakay tungod sa kawad-on, kadalo, tapol, ug uban pang mga kinaiya nga dili angay ipasigarbo. Aduna pa gani nagpasiugda sa maong panglingla nga gamiton ang ngalan sa Dios unya mogamit na og armas batok sa mga tinugyanan sa balaod.
Kusog kaayong makadani ang maong pangpangilad. Gani may mga “investors” nga ipabaligya ang katiganyonan o habwaon ang gidaginot nga salapi aron lamang makaapil.
“Sa dihang hikaplagan niya ang usa ka mutya nga mahalon kaayo, milakaw siya ug gibaligya ang tanan niyang kabtangan, ug iya kining gipalit,” nagkanayon ang ebanghelyo sa pagtandi sa sambingay sa sakripisyo nga gikinahanglan aron madawat ang gingharian sa Dios. Tawag kini sa paghinulsol ug paghatag og luna sa Ginoo dinhi sa atong kinabuhi. Tawag kini sa paghatag og labing taas nga pagtagad sa atong relasyon sa Dios.
Ang makabaton sa gingharian sa Dios makabaton usab sa dimatukib ug dimahurot nga kaayohan nga gikan sa Ginuo. Walay mapordoy niini kay waykinutoban ang bahandi ug kaayohan sa Dios.
Gilarawan ni Solomon ang tawag sa paghatag og labing dakong bili sa gingharian sa Dios. Wala siya mangayo og taas nga kinabuhi ni bahandi ni kamatayon sa mga kaaway apan ang maalamon nga kasingkasing nga maantigong moaninaw sa matarong. Nakapahimout kini sa Dios. Sa laing bahin, kon unahon ang gingharian sa langit kon gugma sa Dios ang tanang butang mokonsabo alang sa kaayohan sa mga tawo. Mao kini mensahe sa sulat ngadto sa mga taga-Roma.
Andam ug tagana ba kitang nga mohatag og luna sa Dios sa atong kinabuhi?