KAPULISAN nipahigayon og manhunt operation batok kang "Bong Revilla" human iyang napatay ang usa ka tiguwang lalake nga giingong "antingan" niadtong alas 4:10 sa Biyernes sa hapon, Hulyo 24, sa Barangay Nug-as, lungsod sa Alcoy.
Wa na makauli sa ilang balay si Claudio Priolo, 60, ulitawo, mag-uuma human nakaangkog daghang mga samad tinigbasan ug dinunggaban sa nawong liog ug lawas.
Di ang sikat nga artista ug senador ang suspek, kundi si Jessie Endaya, 45, alyas "Bong Revilla," ulitawo, mag-uuma, kinsa nakaeskapo.
Si Police Master Sergeant Job Sarbida, sa Alcoy Police Station nga nahinabi sa Superbalita Cebu niingon nga si Endaya nananom sa luna nga gitikad ni Priolo.
Si Priolo, uban sa tag-iya sa luna nga si Edgardo Arias, nagkakomprontase tali kang Endaya kabahin sa pagpananom nga wa mananghid.
Sila si Priolo ug Arias ningpauli na lang kay pwerti nang isuga ni Endaya. Apan samtang sila naglakaw, gisundan dayon gitigbas si Priolo hinungdan sa kamatayon niini.
Si Arias nakadagan ug nakapangayog panabang human nakasulod sa balay sa ilang silingan.
"Di mi motuo anang anting-anting niya nga sulti nila kay kon duna pa, kublan unta siya, di unta madutlan," dugang ni Sarbida.
Si Lieutenant Henry Estoy, hepe sa Alcoy Police Station nga nahinabi sa Superbalita Cebu, nagkanayon nga si Priolo naila nga isog sab sa ilang lugar.
Si Priolo kinsa gikatahong hubog uban ni Arias niadto sa balay ni Endaya kay ilang gibadlong.
"Tungod lang sa pagpananom, unya pulos isog, duna naman pud daw agi ang suspetsado nahitabo ang kremin, unya hubog man ang biktima, siya napatay," dugang ni Estoy.
Dugang niya nga si Endaya maulo-ulohan sumala sa mga silingan.
Gitawag siyag "Bong Revilla" tungod kay mahilig kaayo motan-aw sa mga salida sa senador.
Matod ni Sarbida nga wa na nila maabti si Endaya atol sa hot pursuit operation. (GPL)