Gipatay ang guwardiya sa Sea Oil Gasoline Station sa Barangay Tuyan, dakbayan sa Naga nga gitulis sa wala matino nga gidaghanon sa armadong mga tawo kagahapon sa alas 6:20 sa buntag, Hulyo 26.
Si Rogelio Librando Patatag, 55, minyo ug taga Barangay Inayagan, Naga, sakop sa Multimodal Security and Investigations Agency, patay human nakaangkog samad pinusilan sa iyang ulo ug lawas.
Si Police Master Sgt. Jake Catane, imbestigador sa Naga Police Station nga nahinabi sa Superbalita Cebu, nagkanayon nga ang krimen nadiskubrihan ni Jake Lara, hingkod ang panuigon, cashier sa Sea Oil Gasoline Station, taga Brgy. Inayagan, Naga.
Si Lara, mibutyag nga mi-duty siya mga alas 6:30 sa buntag, miadto siya sa pansayan sa gas station aron motubag sa sugo sa lawas.
Apan nakugang siya kay sa pagsulod niya, ang biktima nga gwardiya naglunang na sa kaugalingong dugo nga dunay samad pinusilan sa ulo.
Gipahibalo nila ang kapulisan kabahin sa insidente.
Gibutyag ni Police Master Sgt. Catena, nga tulis gyud ang motibo sa krimen kay sa ilang imbestigasyon sa crime scene nahanaw na ang cash diha sa steel vault.
Ang cash halin sa gas station sulod sa upat ka adlaw nga mobalor sa P581 mil.
Walay CCTV camera ang maong gas station hinuon ilang gisubay karon sa imbestigasyon ang mga establisemento dili layo sa lugar nga dunay CCTV.
Duna silay nahinabi nga mga residente sa dapit nitug-an nga mga ala 1:00 gyud sa kaadlawon nakadungog silag buto sa armas, human niini dunay sakyanan nga miagi.
Ang lugar dunay mga panimalay apan mingaw ang dapit sanglit dakog hawan ang gas station.
Matod ni Catena, sa ilang tan-aw duha ngadto sa tulo ka tawo ang responsable sa pagpanulis.
“Limpiyo kaayo nila pagkatrabaho so makonsiderar nato nga well plan o mga professional ang responsabli,” dugang ni Catena.
Gipadayag niini nga dili masalikway nga dako kining maong grupo sa mga tulisan, unya ang guwardiya nisukol maong gipusil sa ulo ug gitagoan sa CR pagkahuman.
Hinuon, wa sab nila isalikway ang posibilidad nga inside job ang krimen hinungdan nga kabahin sa ilang imbestigasyon ilakip sa pagpatawag ang siyam ka crew sa gas station.
Sa inisyal nilang nakita, samad sa ulo ug lawas ug dunay slug naa sa lawas, walay narekuber nga kabhang gikan sa crime scene.
Sa pagkakaron, magpaabot sila sa report sa Scene of the Crime Operatives (Soco) 7, ug mopalapad sila sa ilang imbestigasyon bahin sa tulis sa sayong buntag.