GIKAHINAMAN sa mga katawhang Pilipino karong adlawa, Hulyo 27, 2020 ang ikalimang State of the Nation Address (Sona) sa atong Presidente Rodrigo Roa Duterte.
Siyempre, ato nang nakita ang mga grupo nga wala maka-uyon niini, mao ra ang mga oposisyon ug ang mga militanteng pundok, pero, kinahanglan pa ba nga atong hatagan og balor kining mga aktibistang pundok?
Sukad-masukad wa man gyu’y presidente sa nanglabay panahon nga wala nila rally-he, kay kini, ila man nga mga personal interes.
Mokabat na sa 130,000 ka ektaryang yuta nga iya sa atong gobyerno ang gipang-apud-apod sa mga pobreng mga mag-uuma nga nagkinahanglan og yuta, mga panimalay nga iyaha unta sa mga sundalo ug kapolisan ilang gi-iskuwat, ug wala nalang usab bawia sa atong presidente gihatag nalang sa ila.
Sa tinuod lang walay katagbawan kining mga klase sa tawo bisan pa og imo ning hungitan hasta pan’g imong kamot lamyon pa nila. Kung ari pud ta sa mga “dilawan” natural pamolitika, bantayan lang og unsay gamay nga sayop sa presidente ug ilang himuong dako, apan tinaptapan ang ilang mga mata sa nagbudlat nga kamatuoran sa gihimo sa presidente.
Una, insulto sa daghan nang mga presidente nga milabay, wala makapanghinlo sa ilang nataran, taga Mindanao pa nga presidente ang nakapanghilo sa Manila Bay, nga nagtipun-og nga mga basura, pila na ka presidente nga taga Manila ang wala makahunahuna niini, only presidente Rodrigo Duterte ra gayod.
Karong adlawa, dili malikayan sa iyang Sona ang iyang pagbungkag sa mga oligarch, nga dugang nagpabug-at sa mga problema sa pobreng mga Pilipino, sama sa water system, oil price, ug mga presyo sa mga nag-unang mga palaliton nga sagad mga pobre maoy mag-antus.
Human daw sa Sona, i-agenda na sa Kongreso ang ChaCha kun Charter Change, kay kuno maoy sugyot sa Liga sa mga Mayores sa tibuok Pilipinas; maayo unta kung ang pag-usab sa atong batakang balaod, wad-on na ang mga oligarch nga dili manghilabot sa mga eleksiyon ma lokal man o nasyonal tungod kay kini sila ang mas hari pa kay sa presidente.
Samtang ni-a pa kining maong sistema, kon kinsay mahimong presidente dili gyud kalikayan nga adunay kakampi nga oligarch, ug tungod kay bilyon bilyon ang ilang gigasto hakpon nila ang tanang mga nag-unang kapanguwartahan sa ahensiya sa atong gobyerno, ug bisan kinsang presidente dili ug dili gyud makabalibad tungod sa utang kabubut-on.
Hinaut nga mahunahunaan kini sa atong presidente kon tinuod manggyud nga kausaban ang atong gustong mahitabo, kay kon magpabilin ta nga ingon niini, ang unang tagdon sa bisan og kinsay ma-presidente ang pagbayad og utang kabubut-on sa mga Oligarch nga maoy nakapadaug kaniya.
Kung mahitabo kini, makala-um kita sa kangayan sa pagpadagan sa atong gobyerno. Dili sad nato mabasul ang atong pangulo tungod kay mao man kini’y atong sistema nga iyang gisunod mao nga dili pud kalikayan nga aduna siya’y mga oligarch.
Duna pa’y duha ka tuig nga nahabilin sa atong presidente manghinaut kita, nga unta dinhi sa iya magagikan ang tinuod nga kausaban sa atong sistema sa panggobyerno sa ikalimang Sona karon.