STA. CRUZ, Davao del Sur -- Gilusad sa Technical Education and Skills Development Authority (Tesda) ang skills training on poverty reduction and livelihood program, didto sa Barangay Saliducon, niadtong Biyernes, Hulyo 24, 2020.
Mismong si Tesda Director General Secretary Isidro Lapeña ang nanguna sa pagpahigayon sa aktibidad alang sa poultry raising ug vegetable and crop production nga himoon sa mga barangay nga gideklara sa Department of Interior and Local Government (DILG) nga gawasnon na sa teroristang kalihukan sa mga rebeldeng New People’s Army (NPA).
Ang programa nahisubay sa Executive Order number 70 ni Presidente Rodrigo Duterte ug gitambungan sab sa nagkadaiyang opisyal sa 10th Infantry Division (ID), 1002nd Brigade ug 39th Infantry Battalion sa Philippine Army apil ang mga sakop sa kapolisan ug uban pang ahensya sa nasyonal ug lokal nga gobyerno.
Dako ang kalipay ni Saliducon Barangay Kapitan Peter Sombilon nga napili ang ilang barangay nga usa sa makabenepisyo sa programa sanglit kanhi nadistorbo ang panginabuhian sa ilang mga katawhan tungod sa NPA nga wa’y maayong gikatabang sa komunidad.
Atol sa programa, gitataw sab ni Municipal Administrator Omar Martel nga ang programa usa ka manepistasyon nga anaa ang gobyerno sa kanunay nag-suporta sa komunidad.
Samtang, ang kasundaluhan nipasalig nga sa kanunay andam silang mohatag og proteksyon sa mga sibilyan nga di masamok sa rebeldeng kalihukan.
Matod ni 10th ID commander Major Reuben Basiao nga sa kanunay mohatag sila og ayuda sa pagmintinar sa kahapsay ug kalinaw sa lugar.
Samtang, nanghinaot si Lapeña nga magpadayon ang kooperasyon sa publiko aron mahimong malampuson ang programang gitunol sa gobyerno ngadto sa ilang mga barangay.