KIDAPAWAN CITY -- Nabugtuan sa kinabuhi ang usa ka ulitawo nga gipahit sa banakon (King Cobra) alas 10 sa buntag niadtong adlaw nga Sabado, Hulyo 25, 2020, sa siyudad.
Giila ang biktima nga si Harold Jay Abrenica, 21, second year student sa University of Southern Mindanao–Kidapawan City Campus ug nagpuyo sa Sitio Santa Cruz, Purok Santol Barangay Paco, Kidapawan City.
Gibutyag sa igsoon sa biktima nga si Mary-Ann nga gikuha lamang sa biktima ang iyang gitugway nga kanding sa sagbuton nga bahin unahan sa ilang balay.
Apan kalit lang gipaak ang ulitawo sa banakon sa wala nga bahin sa iyang tiil.
Nakauli pa ang biktima sa ilang balay ug nangayog pakitabang sa iyang pamilya sa diha nga siya gipahit sa king cobra.
Gidala dayon ang ulitawo sa balay tambalanan ug gi-injeksyunan og anti-venom apan wala mitalab ang tambal hinungdan nga gibalhin dayon siya sa dako nga hospital sa Davao City.
Nabugtuan gihapon sa iyang kinabuhi ang ulitawo sa diha nga mikatag na sa iyang lawas ang lala sa banakon.