SUGDAN na sa Philippine Sports Commission (PSC) ang ilang National Sports Coaching Certification Course alang sa mga coach sa Visayas region karong Lunes, Hulyo 27, 2020.
Adunay 1,090 coaches ang nakarehistro alang sa kalihukan nga proyekto sa Philippine Sports Institute’s (PSI) Sports Education and Training Program.
Ang Sugbuanong basketball legend ug PSC Commissioner Ramon “El Presidente” Fernandez nagkanayon nga dili angay mahunong ang ilang mga programa taliwa sa pandemya.
“The present situation in the country should not deter us from continuing our programs and services to the sports community, specifically in enhancing the competencies of our coaches in the schools and the LGUs,” matod ni Fernandez, kinsa 19-time Philippine Basketball Association (PBA) champion.
Mosalmot sa maong training ang sports coaches sa elementary ug high school students sa Visayas.
Aron hapsay ang training, bahinon sa managlahi nga batch ang mga partisipante. Ang course certification mag-follow sa Level 1 modules sa Sports Philosophy, Sports Pedagogy, Sports Psychology, Sports Physiology, Talent Identification ug Sports Ethics.
Ang mo-lecture mao sila PSC-PSI sports education dean Prof. Henry Daut, PSC-PSI sports psychology head Dr. Karen Katrina Trinidad, PSC-PSI sports physiology head Prof. Josephine Joy Reyes, PSC-PSI sports specialist Prof. Luis Serafin Cosep ug Fr. Fonz Suico, CSSR.
Managlahi nga pamaagi maoy gamiton sa mga lecturer gamit ang Google Meet ug Google Classroom tools.
“More coaches from other regions nationwide will have the opportunity to avail of Level 1 modules later this year,” matod ni PSI Sports Education Head Henry Daut.
Human sa Visayas region, sundan dayon kini sa mga taga Luzon karong Agusto 10-13, samtang ang Mindanao online seminar gikatakda sa Agusto 17-20.
Ang programa sa PSI unang gibuhat niadtong 2018 sa Tagum City ug gisundan kini niadtong 2019 sa Legaspi City ug Davao City.
Gihimo kining online karong tuiga tungod sa pandemiya. Ang mga nipasar sa Level 1 certification sa miaging tuig mo-proceed na sa Level 2 online certification nga gitakda karong Nobiyembre. /