SUPERBALITA CEBU

Barili mosunod nga destinasyon sa turismo

DUNAY dili mominos dul-an sa 200 ka mga dolphin ang nagpakita sa kadagatan sa lungsod sa Barili matag adlaw nga gikalingawan sa pagtan-aw sa mga lokal nga molupyo sa lungsod.

Si Barili Mayor Marlon Garcia nagkanayon nga ang mga dolphin padayong nagpakita sa ikadagatan sa Barangay Japitan ug Hilasgasan, nindot nga himuong usa ka aktibidades sa ecotours travel sa lugar.

Nikabat ngadto sa duha ka buwan ang ilang tourism team nakamatikod nga ang spinner dolphins ug Fraser’s dolphins nga mga klase sa dolphins, magsige og patim-aw sa ilang kadagatan.

Ang spinner dolphin usa ka klase sa dolphin nga motambling gikan sa dagat samtang ang Frayer’s dolphin gihinganlan sa usa ka scientist sa Britain nga si Francis Frayer nga unang nakadiskobre sa maong dolphin niadtong 1956 base sa bukog nga nakit-an sa baybayon sa Borneo.

Gituohang ang maong mga dolphin anaa ra sa Sugbo subay sa Tañon Strait.

Ang mga dolphin mopatim-aw sulod sa 30 minutos nga mogikan ang bangka sa pantalan sa Barangay Japitan ug mokuyog kini sa paglayag.

Niadtong Hulyo 25, 2020, matod ni Victor Vergara, tourism officer sa Barili, nga atol sa ilang site tour una kini nga higayon nga sulod lang sa lima ka minutos human sila nilawig gikan sa pantalan, nipatim-aw na kining mga dolphin.

Dunay lima ka grupo nga nipatim-aw niadtong higayon.

Matod ni Vergara, sagad sa mga miaging buwan kutob lang kini sa duha ka grupo sa dolphins, apan karon mokabat pa kini ngadto sa walo ka grupo.

Posible sab nga mokabat ngadto sa 200 ka dolphins ang moanha sa ilang kadagatan sigon ni Vergara.

Ang maong mga dolphin anaa lang sa usa ka kilometro gikan sa baybayon sa Barangay Japitan ug Hilasgasan.

Naghimo si Garcia og usa ka resolusyon aron pagtakda og guidelines aron pagbutang og balanse sa ecotourism isip economic opportunity sa Barili ug padayon sa pagpreserbar sa Tañon Strait ug sa mga mananap sa dagat niini nga gilatid sa Proclamation No. 1234 nga gipirmahan ni kanhi Presidente Fidel Valdez Ramos kaniadtong 1998.

Gawas niini, matod ni Vergara, sila gikatakda nga magbansay sa ilang frontliners karong Hulyo 30 ug 31 kauban ang mga espesyalista sa Department of Environment and Natural Resources (DENR) 7 sa pagdumala sa kalikopan.

“This will help our tourism team and guides to understand better the dos and don’ts in dolphin watching. We do not want to mess up with environmental regulations. Mao sad ni nga dili pa ni nato madali-dali og open to our tourists kay gusto nato nga i-comply from ordinance to permits, aron nga dili gyud ta makaligis og mga balaud sa protection aning mga dolphins,” sigon ni Vergara.

Usa ka marine biologist ang motabang nila isip parte sa kawani sa turismo aron pagpanukiduki og mga dugang impormasyon kabahin sa mga dolphin, sigon ni Vergara.

Ang maong mga pagpaningkamot aron pagbutang og guest briefing station sa Hilasgasan ug pagbansay sa mga cultural interpreter sa komunidad aron mohatag sab og mga dugang impormasyon sa kasaysayan sa lugar sama sa pagpatim-aw sa mga dolphin, whales, whale sharks sa nangaging mga siglo.

Nasayran nga ang whale shark o tuki sa kadagatan sa lungsod sa Oslob sa habagatang-silangan sa lalawigan sa Sugbo nidani og daghang turista ug nihatag og minilyon nga kita sa lungsod lakip sa panginabuhian sa katawhan sa dapit.

Ang Barili nahimotang sa habagatang-kasadpan sa lalawigan. /


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!