ORMOC CITY - Usa ka pulis ug barangay kapitan ang gipamusil-patay sa managlahing dapit sa Eastern Visayas.
Ang pulis patay human gipusil sa kaubang pulis sud sa ilang kampo sa Barangay Guindapunan, Catbalogan City, Lunes sa alas 2:18 sa kaadlawon, Hulyo 27.
Ang biktima giila nga si Patrolman Lloyd Imano, 32, minyo, taga Barangay Sto. Niño, Coronadal City.
Samtang ang suspek mao si Patrolman Eduardo Dela Cruz, 33, ulitawo, taga Mauling Creek, Taguig City.
Ang duha mga sakop sa Philippine National Police (PNP) 124 Special Action Company (PNP-SAC) nga nakabase karon sa Gymnasium sa Barangay Guindapunan.
Base sa report sa Police Regional Office (PRO) 8, naglalis ang duha kay ang biktima miakusar sa suspek nga maoy nagrekomenda nga ipubos ang biktima sa sureshock training.
Nagtinubagay ang duha ug si Imano kalit misud sa bunkhouse ni Patrolman Alvin Migriño.
Paggawas ni Imano gipamusil siya ni dela Cruz gamit ang service firearm.
Dugang sa report sa PRO 8, nagtuo si dela Cruz nga nagkuha og long firearm si Imano hinungdan nga giunhan kini niya pagpusil.
Gidala sa tambalanan ang biktima apan gideklarar nga dead-on-arrival (DOA).
Boluntaryo nga nitahan sa iyang mga kauban ang suspek ug gidala sa kustodiya sa Catbalogan Police Office.
Gitahan usab sa suspek ang iyang kalibre .9mm nga service firearm nga dunay walo ka bala.
Narekober sa crime scene ang upat ka basiyo sa bala sa samang kalibre.
Sa laing bahin, kapitan sa barangay sa Albuera Leyte ang gipusil-patay sa riding-in-tandem sa Zone 10, Baybay City, Southern Leyte, alas 8:45 sa buntag Hulyo 20, Lunes.
Giila ang biktima nga si Andres Cruz, 46, kapitan sa Barangay Sherwood, Albuera, Leyte. Base sa inisyal nga imbestigasyon sa kapulisan, ang biktima nagbarog atubangan sa Immaculate Conception church.
Kalit nga niabot ang responsable ug gipamusil sa makadaghan nga higayon ang biktima nga miresulta sa kamatayon niini.
Dali misibat sa wa matino nga direksyon ang mga responsable human sa pagpamusil.
Gidala pa sa Western Leyte Provincial Hospital ang biktima apan gideklarar nga DOA, alas 9:25 sa buntag.
Si Cruz gikan sa korte sa Baybay alang sa usan ka hearing apan wala mahinayon.
Si Cruz gipasakaan og kaso tungod sa pagpusil niini sa iyang konstityuwente nga si Paulito Paton-og nga mangayo unta og barangay certification alang sa social amelioration program (SAP).
Nidepensa si Cruz nga nagtuo siya nga iyang kontra ang iyang konstityuwente busa iyang giunhan sa pagpusil sa makaupat ka higayon.
Wa makaila si Cruz kayt naka helmet ug naka-face mask ang iyang gipusil.
Si Paton-og gidala sa iyang kauban nga si Jaime Agcang sa tambalanan sa Ormoc pero gideklarar nga patay na.
Padayon pa nga giimbistigahan sa kapulisana ang motibo sa pagpatay kang Cruz. (JKDP)