USA usab ka Authorized Person Outside Residence (Apor) ug ang iyang igsoon ang duha ka mga bag-ong kaso sa coronavirus disease (Covid-19) sa Cagayan de Oro.
Sa pagkakaron, naa na sa 126 ang kumpirmadong kaso sa Covid-19 sa dakbayan.
Ang ika-125 nga kaso usa ka 29-anyos nga lalaki nga Apor ug residente sa usa ka gated community sa Barangay Iponan. Matud ni City Health Office Epidemiologist Dr. Joselito Retuya, ang lalaki nakasinati og loss of smell ug taste ug hilanat kaniadtong Hulyo 13.
Hulyo 23 nakasinati siya og ubo. Nailhan ang lalaki nga usa ka asthmatic. Gi-swab siya Hulyo 21 ug ang resulta nigawas nga positibo Sabado sa hapon, Hulyo 25.
Sa pagkakaron, ang lalaki nagpabili sa Temporary Treatment and Monitoring Facility.
Ang iyang family close contacts, matud ni Retuya, gi-swab pud niadtong Hulyo 21 ug nagnegatibo ang resulta. Kasamtangang silang nagpabilin sa city isolation unit tungod kay ang ilang last date of exposure sa nagpositibo nga pasyente Hulyo 25.
Ang 29-anyos nga lalaki adunay pito ka mga workplace contacts nga gi-swab pud, ug usa ka direct contact nga asymptomatic. Tanan sila nagpabilin sa city isolation unit.
Ang tulo nga close contacts sa pasyente gi-under close monitoring ug magpailalom sa home quarantine.
Ang ika-126 nga kas 30-anyos nga igsoon nga babaye sa ika-125 nga kaso ug nagpuyo usab sa usa ka gated community sa Barangay Iponan.
Matud ni Retuya, usa siya ka locally stranded individual (LSI) gikan sa Manila nga miabot sa Cagayan de Oro kaniadtong Hunyo 29 pinaagi sa eroplano.
Gidala diretso ang babaye sa city isolation unit kon asa siya gi-swab ug nagnegatibo sa virus. Gi-discharge siya kaniadtong Hulyo 3.
Apan gi-swab usab siya Hulyo 26 human nga nagpakita og sintomas kauban ang iyang igsoon. Ang resulta nigawas nga positibo.
Sa pagkakaron, nagpabilin usab siya sa Temporary Treatment and Monitoring Facility.
Bisan pa nga ang duha sa mga residente niini nagpositibo sa Covid-19, giingon ni Retuya nga ang gated community sa Barangay Iponan dili ibutang ilalom sa focused containment.
Dugang ni Retuya nga sa pag-inspeksyon, wala silay nakita nga rason nga i-contain ang lugar. Ang kalihukan sa duha nga mga pasyente limitado ug ang mga residente sa lugar adunay firewall nga nagbulag kanila sa usa'g usa.