LOCKDOWN. Kagahapon mipadangat si Presidente Rodrigo Roa Duterte sa iyang ikalima nga State of the Nation Address (Sona) apan wa pa magsusod sa akong pagsulat ning akong lindog. Ang Malacañang nagpasabot nga maghisgot ang Presidente sa pagpausbaw sa atong ekonomiya nga naigo aning pandemia sa coronavirus disease (Covid-19).
Ang mga negosyo, gawas sa mga supermarket ug tiyangge, nanirado tungod sa Covid-19 sugod niadtong Marso dihang miorden is President Duterte og general community quarantine (GCQ) unya nahimo nga enhanced CQ dihang midaghan ang nataptan sa virus.
Si Cebu city Mayor Edgar Labella nanghinaut nga dunay plano ang Presidente nga mapugngan nga daghan ang mawad-an og trabaho tungod aning Covid-19. Tungod sa lockdown nga gipatuman sa IATF di lang dinhi sa dakbayan sa Sugbo, daghan na ang wala nay panginabuhian.
Sa karon, ang Cebu city ra ang nagpabilin nga ECQ tungod sa kadaghan sa kaso sa Covid-19. Niadtong Hulyo 25, miabot na og 8,657 ang kaso sa Covid-19. Apan ang nakaayo kay dunay 4,872 nga naayo. Sa ato pa, kon minusan sa mga nakalingkawas sa virus, 3,785 na lang ka tawo ang nag-antos pa sa Covid-19.
Tungod sa estado sa dakbayan, ang IATF mopatuman og “granular lockdown” o isira ang mga dapit, sama sa balay, sitio o compound, nga dunay napositibo sa Covid-19. Gani, makauuwaw nga nahimong lalis sa social media ni Konsehal Joel Garganera ug City Administrator Jun Casas sa paggawas sa social media sa lockdown order ni Mayor Labella.
Matod pa ni Konsehal Garganera, deputy implementer sa IATF sa dakbayan, nga walay pagtugot gikan sa IATF ang pagpagawas sa lista sa mga dapit nga ibutang sa granular lockdown. Mitubag si Casas dala og pangutana nga kinahanglan pa ba diay mananghid ang mayor kon kinsa ang iyang pananghiran.
Ang rason, matud pa, nga di sa ibutyag ang mga dapit nga masulod sa lockdown kay basin moikyas ang mga positibo sa Covid-19. Wa man ni mohaum sa husto nga pangisip ug sa atong naandan nga pamatasan. Mora man og kriminal ang dunay virus kay mosibat. Pananglitan og molayas, asa man siya/sila padulong? Ang tawo nga dunay sakit ang naa sa iyang huna-huna ang pagpatambal ra.
Ang mga opisyal sa barangay unta ang mopahibawo sa mahitungdan aron makapangandam sila sa ilang mga panginahanglan sa balay. Bisan og misaad ang dakbayan sa Sugbo nga mohatag og rasyon sa pagkaon, apan di kasaligan kay basi sa panghitabo sa unahan, way klaro ang paghatag sa hinabang.
Ang mga opisyal di angay magbangi sa social media kay mahimo ra man nga ilang hisgotan sa husto nga pamaagi. Matinuod lang hinuon ang pagduda sa katawhan nga gubot pas lukot ang mga opisyal ning problema sa Covid-19.