GUSTO ni Presidente Rodrigo Duterte nga ibalik ang silot nga kamatayon sa mga tawo nga nangalambigit sa illegal drugs. Gusto niyang ipaagi sa lethal injection ang pagsilot sa kamatayon sa nakahimog grabeng krimen sa pagpamaligya og illegal drugs.
Sa iyang pagsulti niiini, gihisgutan ni Duterte ang National Bilibid Prisons (NBP) nga naa didto ang labing dagkong drug lord sa nasod nangabilanggo. Matod niya nga ang illegal drug operations sa nasod nga nagpadayon nagagikan sa national penitentiary.
Ingon sa gipasumbingay sa Presidente nga kon duna pay death penalty, patay na kining mga tawhana ug wa na makapadayon sa illegal nga negusyo kay gibitay na. Kay buhi pa man sila, nagpadayon sila sa ilang illegal nga negusyo. Busa kinahanglan silang bitayon aron maputol na ang ilang buhat.
Namatud-ang gikan sa NBP ang mga utok sa pagpadagan sa illegal drugs sa nasod kay ang nasakmit gitumbok nga iya sa mga sindikato nga gipadagan sa mga drug lord nga nangabilanggo.
Nakaplagan sa mga awtoridad nga ang dagkong mga drug syndicate nga nag-operate dinhi sa nasod gipadagan sa samang mga tawo. Ang ilang worldwide network, labina sa Asya, nagpadayon tungod kay wa maputol ang komunikasyon.
Daghan nang mga paagi nga gibuhat si Duterte, sama sa pagpuli sa mga security personnel sa Bureau of Jail Management and Penology (BJMP) sa Special Action Force (SAF) aron maputol. Apan temporaryo lang kining epektibo, kay paglabay sa pipila ka mga buwan, nakabalik ra.
Bisan gani ang lokal nga network ni self-confessed drug lord Kerwin Espinosa gitumbok man nga nibalik pag-operate kay ang bag-ong nasakmit nga labing minos P6 bilyunes nga illegal drugs nakuha gikan sa iyang kanhi mga tawo. Epektibo tingali ang death penalty sa pagbitay sa dagkong mga drug lord sa nasod, apan kon ang graft and corruption ug kakabus magpadayon, bisan pag pila ang bitayon, ang illegal drugs magpadayon.