USA ka Chinese national nga nagpailang doktor ang nasikop sa mga sakop sa National Bureau of Investigation (NBI) 7 human namaligya og dili registradong Chinese medicines sa dakbayan sa Lapu-Lapu niadtong Hulyo 24, 2020.
Nasikop si Ke Liangping, kinsa adunay klinika sulod sa iyang panimalay sa usa ka subdivision sa Barangay Soong.
Matod ni Atty. Tomas Enrile, regional director sa NBI 7, nga si Liangping nasikop sa buy-bust inabagan sa kapulisan saLapu-Lapu ug Food and Drug Administration (FDA) 7.
Nakasakmit ang NBI og nagkadaiyang Chinese medicines nga gibanabana nga mobalor tanan og P10 milyunes diin lakip sa nasakmit ang giingong tambal sa Covid-19.
“Positive yung buy bust was caught in the act of receiving a money,” matod ni Tomas Enrile.
Nagsugod ang monitoring sa NBI ni Liangping human makadawat og report nga namaligya og mga medisina ang langyaw ug nagpadagan og klinika sulod sa iyang panimay.
Nakig-alayon dayon sila sa FDA 7 aron makisayod kung legal ba ang pagpadagan sa iyang klinika ug pagpamaligya og Chinese medicine ni Liangping.
Sa dihang nikompermar ang FDA nga wala marehistro sa ilang buhatan ang maong pangalan sa langyaw ug ang clinic niini gilusad dayon nila ang operation.
Nakita sa mga operatiba sa sulod sa clinic niini ang hospital beds nga adunay pasyente nga giatiman nga usa ka babaye nga Chinese national.
Sigun sa nakuha nga impormasyon ni Enrile nga ilado sa Chinese community sa Sugbo si Liangping nga usa ka doktor.
“He is really popular among local Chinese. Most of the habitants in the subdivision are Chinese. In fact, during the operation, he had one patient with intravenous attached to her arm,” dugang ni Enrile sa Superbalita Cebu.
Sa dihang gipaubos na sa imbestigasyon sa mga operatiba, niinsister kini nga usa siya ka doktor sa nasud sa China apan wala siyay ikapakita nga lisensya pagpamatuod nga usa siya ka tinuod nga doktor. (AYB)