GUSTO ni Presidente Rodrigo Duterte nga buhion ang death penalty sa nasod alang lang sa krimen nga may kalambigitan sa illegal drugs.
Nakita ni Duterte ang panginahanglan sa pagpalabang og balaud nga magpahamtang og balik sa silot sa kamatayon, busa atol sa iyang ikalima nga State of the Nation Address (Sona), iyang giawhag ang duha ka mga balay balauranan sa pagpanday og balaud alang niini.
“I reiterate the safe passage of a law reviving the death penalty by lethal injection for crimes specified under the Comprehensive Dangerous Drugs Act of 2002,” matod sa Presidente.
Matod niya nga isip pangulo sa nasod, daghan siya og nahibaw-an kalabot sa illegal drugs sa nasod, apan nagdumili siya sa paghatag og mga detalye.
Si Duterte niingon nga ang silot sa kamatayon makapahadlok sa mga tawo sa pagbuhat og krimen, labina sa illegal drugs.
“This law will not only deter criminality, but also save our children from the dangers posed by the illegal and dangerous drugs,” matod ni Duterte.
Iyang gihimong sanglitanan ang nahitabo sa mga nasod sa Colombia ug Mexico, diin ang illegal drugs gipadagan sa mga drug lord nga naa sa sud sa mga national penitentiary nangabilanggo.
Dinhi sa nasod, ang dagkong mga drug lord nga nagpadagan og mga drug syndicate naa sa New Bilibid Prison (NBP). Kadaghanan kanila maoy nagkontrolar sa illegal drug trade dinhi.
Nagtuo ang Presidente nga kon gipangbitay pa kining mga tawhana, naputol na unta ang ilang drug networks.
Iyang gihulagway ang illegal nga drugs nga nakaguba sa daghang mga pamilya. (REV)