NIHULGA si Presidente Rodrigo Duterte nga iyang pasirhan ang mga telecommunications company (telcos) sa nasod kon di nila mapalambo ang ilang serbisyo.
Iyang gitagalan hangtod sa Disyembre 2020 ang mao nga mga kompaniya.
Sa iyang ikalima nga State of the Nation Address (Sona) sa Hulyo 27,2020, si Duterte nipadayag sa iyang kahimangod sa di maayong serbisyo sa telcos. Iyang gitumbok ang Smart ug Globe.
“I might just as will close all of you. We revert back to the line telephone and kukunin ko yan (frequency), i-expropriate ko sa gobyerno,” matod ni Duterte, kinsa wa una motamod sa iyang sinuwat nga pagpamulong dungan sa iyang pagpangayo og pasaylo sa duha ka mga balay balauranan ug mga nanambong. Kini aron iyang mapadayag ang iyang wa pagkauyon ug kahimangod sa serbisyo sa mga telco.
Nahisgutan kini niya tungod usab sa nag-angat nga pagbukas sa klase sa hinapos sa sunod buwan nga ipaagi sagad sa online ang pagtudlo samtang nagpadayon ang hulga sa coronavirus disease (Covid-19) sa nasod.
Daghan sa mga dapit pa sa nasod ang way internet connection. Si Duterte niingon nga daghan na kaayong mga reklamo nga niabot kaniya kalabot sa “lousy service” sa mga telco sa nasod.
“The patience of the Filipino people is reaching its limit,” matod niya. Niini, gikinahaglan nga sa wa pay Disyembre 2020, mapalambo na sa mga telecom giant ang ilang serbisyo nga layo ra kon itandi sa ubang mga nasod.
Nagtuo ang Presidente nga gikinahanglan nga mobubo og dugang puhonan ang mga telco aron mapalambo pa ang ilang serbisyo, “else we will be forced to take drastic steps,” bahad ni Duterte.
“Huwag naman kami ninyong pahintayin ng sampung taon bago yan makakamit nga services that the other countries are enjoying,” dugang niya. Sagad sa mga reklamo sa mga konsumidor nga gipaagi kadaghanan sa social media mao ang kahinay sa internet connection.
Laing naandan nga reklamo mao ang kahinay sa pagtagad sa mga kompaniya sa pagsulbad sa ilang mga problema, sama sa pagkaputol sa connection nga ang uban moabot pa og usa ka buwan una maaksyunan.
GIPALAMBO
Apan ang Globe Telecom, pinaagi kang Yoly Crisanto, senior vice president sa corporate communications, niingon nga padayon silang nagpalambo sa ilang serbisyo sa tibuok nasod.
Karon lang tuiga, naggahin sila og 1.2 billion US dollars alang sa ilang capital expenditures (capex) aron ilang mapalambo ang ilang serbisyo ug matubag ang panginahanglan sa paspas nga date sa mga customer.
“These substantial investments are paying off as we experience marked service improvements. Today, the Globe network is running at 4G/LTE. Last year, we launched 5G for Globe at Home and soon we will be launching mobile 5G services in the country,” matod ni Crisanto sa usa ka pamahayag nga iyang gipadala sa Superbalita Cebu.
Iya usab nga gitataw nga ang Pilipinas usa sa mga nasod nga maayo og mobile video services. Bisan sa ilang paninguha nga mapalambo ang serbisyo, ang nagkadaiyang mga buhatan sa kagamhanan ila usab nga gibasol sa kahinay sa ilang pagpamutang o pagtukod og mga imprastraktura.
“The long drawn permitting process across LGUs, HOAs and national agencies including the DOH and CAAP have hampered cellsite builds and laying down of fiber to homes,” matod ni Crisanto.
Nanghinaut sila nga pinaagi sa ilang joint memorandum circular tali sa Department Department of Information and Communications Technology (DICT) ug ubang mga ahensya sa kagamhanan, mapadali ang ilang pagtukod og telco towers alang sa mas paspas nga internet connection.
Sa pagsuwat ning taho, ang Smart Communications wa pa makaluwat sa ilang pamahayag.
WAY FACE-TO-FACE
Sa samang higayon, si Duterte niklaro nga wa siya moaprobar sa limitadong face-to-face nga klase kay alang kaniya, gikinahanglan una nga mabakunahan ang mga tinun-an ug magtutudlo batok sa Sars-Cov-2, kagaw nga nagdala sa coronavirus disease.
Di siya gusto nga mabutang sa risgo ang kinabuhi sa mga tinun-an ug magtutudlo.
“Until the Covid-19 vaccine is available, I will not allow the traditional face-to-face teaching or learning unless the risk of exposure to the sickness are eliminated, “ matod sa Presidente.
Ang Department of Education (DepEd) nagtakda sa Agusto 24, 2020 nga pagbukas sa klase pinaagi sa online class, telebisyon, radio ug module nga pagtudlo.
Iyang gibutyag nga nakigsulti na siya sa China aron hangyuon nga kon duna na silay bakuna batok sa Covid-19, mahatagan og prayoridad ang Pilipinas.
“I made a plea to President Xi Jinping that if they have the vaccine, can they allow us to be one of the first, or if it is needed, if we have to buy it, we will be granted credit,” matod sa Presidente.