P12.8M marijuana naibot sa Danao PNP, PDEA 7

MOABOT sa P12.8 million nga balor sa marijuana ang naibot sa mga sakop sa Danao City police station nga gipangulohan sa ilang hepe nga si Police Lieutenant Colonel Maribel Getigan, inabagan sa Philippine Drug Enforcement Agency 7 (PDEA) 7.

Gihimo ang operation pasado alas 4 sa Lunes sa hapon, Hulyo 27, sa sitio Pulgasan Barangay Langusig, bukirang dapit sa Siyudad sa Danao.

Ang 32,000 ka mga punoan sa marijuana nahurot og ibot sa mga operatiba, apan ang nag tanom niini nga nailhan nga si Baristo Camaongay, high value individual, nakabantay sa nagsingabot nga mga pulis hinungdan nga nakaikyas.(AYB)