NAILHAN na sa kapulisan sa lungsod sa Daanbantayan, Cebu ang pito sa 23 ka mga tawo nga naka-ipsot atol sa pag pangronda sa mga sakop sa Regional Intelligence Division 7 sa gipahigayon nga tigbakay sa Sityo Tagasa, Barangay Bitoon niadtong Sabado sa hapon, Hulyo 24, 2020.
Ang pito nasuta nga mga elected officials diay diin ang tulo niini mga barangay kapitan samtang ang upat mga konsehal sa managlahing lungsod sa norte nga bahin sa lalawigan sa Sugbo.
Gihinganlan ni Police Brigadier General Albert Ignatius Ferro, hepe sa Police Regional Office 7 ang tulo ka kapitan nga sila si: Narciso Osabel sa Maharuhay, Medellin; Arnold Arcipe sa Dayhagon, Medellin ug Rodelo Diamante sa Colonia lungsod, Tuburan.
Samtang ang mga konsehal sa lungsod mao silang Bernardito Luche sa Daanbantayan, Buena Pontillas sa Tuburan ug Moman Rivera ingon man si Abdon Cabahug taga Borbon, Borbon.
Matod ni Ferro, iya nang gimandoan ang Daanbantayan Police nga pasakaan og kasong kriminal ang maong mga elected official.
Giklaro sa heneral nga mag-atubang og kasong kalapasan sa Presidential Decree 1602 kon illegal gambling ug Republic Act 11332, mas naila nga Bayanihan Act, nunot sa padayon nga Covid-19 pandemic.
Gawas niini nagpadala na usab ang kapulisan ug impormasyon sa Department of Interior and Local Government (DILG) 7 ug ngadto ni DILG Secretary Eduardo Año alang sa pagpasaka og kasong administratiba.
Nasagmuyo si Ferro sa nahisgutang mga elected official nga sila unta magsilbing modelo sa ilang komunidad apan mao na hinuoy nag-una-una sa illegal nga sugal taliwala sa pandemya.
Makadaghan na nga mipahimangno ang kapulisan nga dili mohimo og mga panagtapok ilabi na ang mga illegal nga sugal tungod kay usa kini sa tinubdan sa virus.
Gihulagway ni Ferro nga gahi og ulo ang pipila ka mga tawo sa Sugbo nga bisan sa gibalik-balik nga panawagan aduna gihapoy mosupak, ug mga opisyal pa sa lungsod ug sa barangay.
Nimando usab ang heneral sa tanan niyang mga sakop nga pahugtan pa nila ang ilang monitoring sa illegal nga sugal sa tibuok Rehiyon 7 ug mibahad nga pasakaan gyud og kaso bisan kinsa pa ang nalambigit niini. (AYB)