SAULOGON ugma, Hulyo 30, ang World Day Against Trafficking in Persons.
Usa kini ka pamaagi aron ipasigarbo ang mga kalamposan sa nagkadaiyang sektor, sama sa gobiyerno ug civil society organizations (CSOs), sa pakigbatok sa human trafficking nga gikonsiderar nga usa ka krimen sa Pilipinas ug sa tibuok kalibutan nga dunay bug-at nga silot sa mga mapamatud-ang sad-an niini.
FIRST RESPONDERS
Sumala sa United Nations (UN), angay lang nga pasidunggan karong tuiga ang first responders sa mga kaso sa human trafficking sama sa mga tigsuporta sa mga biktima ug tigpanalipod kanila aron makab-ot ang hustisya.
Dako ang tabang sa first responders sa pagresulba sa maong mga insidente labaw na nga kitang tanan nag-antos sa mga epekto sa pandemiya sama na lang sa kalisdanan sa pagsumbong sa mga krimen lakip na niini ang mga insidente sa human trafficking.
Angay lang nga pasidunggan ang mga manlalaban, social workers, ug uban pang project staff sama na lang sa mga naglangkob sa CLB nga padayon sa pagtabang sa mga biktima sa pagpangabuso ug pagpanghimulos ingon man ang mga kauban niini nga mga organisasyon sama sa kapolisan, prosekyusyon, ug uban pang hugpong nga panalipdan ang katawhan.
Subay sa Expanded Anti-Trafficking in Persons Act of 2012, ang pipila ka mga porma o akto sa trafficking in persons o human trafficking mao ang pag-recruit, pagdala, pagbalhin, pagdawat, pagpasakay, pagtnayg, pagbuhi o pagkuha og mga tawo sulod o gawas sa nasod bisan pa man nga duna kini’y pagtugot sa biktima.
Lakip sa mga pamaagi nga mahitabo ang krimen mao ang pagpanghulga, paggamit og pwersa, pagpamugos, pagdagit, pagpangilad, pagpangabusar sa gahum o katungdanan, pagpanghimulos sa kahuyang sa tawo, o paghatag og bayad sa biktima aron makakuha sa pagtugot niini nga maabusaran.
Tinguha sa traffickers o mga akusado sa maong krimen mao nga mapahimuslan ang mga biktima niini sama sa prostitusyon, sexual exploitation, pugos nga pagpanrabaho, pagkaulipon, ug pagbaligya sa body organs.
Dili na angay nga pamatud-an ngadto sa husgado ang mga pamaagi sa pagbiktima sa usa ka bata lakip na niini kon gipaagi sa adoption ang maong kaso sa pagpahimulos sa biktima.
UNICEF
Gibanabana sa United Nations Children’s Fund (Unicef) nga duna nay 60,000 ngadto sa 100,000 ka mga bata nga biktima sa human trafficking pinaagi sa sekswal nga pag-abuso kanila. Taas ang insidente sa child prostitution sa tourist areas.
Dunay mga batang pugos nga gipatrabaho bisan pa man nga wa pa kini sa saktong pangedaron. Pipil ka mga hinungdan sa child trafficking, matod pa sa Unicef, mao ang kakabus, kakuwang sa kalambuan, gender inequality, kakuwang sa mga kahigayunan sa empleyo, kakuwang sa kasayuran bahin sa krimen, ug sex tourism.
Usa sa mga gipasigarbo sa Pilipinas ang pagkalista isip “Tier 1” nga nasod sa subay sa 2019 Trafficking In Persons Report sa Department of State sa Estados Unidos. Kini nagpasabot nga nasunod sa Pilipinas ang ‘minimum standards’ sa pagwagtang sa maong krimen.
Matod sa maong report, padayon ang pagpakita sa Pilipinas nga seryuso kini sa pakigbatok sa human trafficking sama sa pagmenos sa prosecution procedures nga makadaot sa child sex trafficking survivors, pagsilot sa mga traffickers, ug paglikay nga mahimong biktima sa trafficking ang overseas Filipino workers (OFWs).
Giklaro hinuon sa maong report nga duna gihapoy mga lakang nga angay himuon ang Pilipinas sa pagsugpo sa maong krimen lakip na niini ang pag-imbestigar sa mga opisyal nga gipasanginlang nalambigit sa mga krimen, pagpanubag sa labor traffickers, pagpahatag og specialized protection and assistance alang sa mga batang biktima ingon man sa mga lalaking biktima.
Kuwang sab kuno ang mga serbisyo nga dunay kalambigitan sa mental health, employment training, ug paghatag og trabaho sa mga trafficking survivor.
Gisugyot karon sa mga organisasyon ug mga mambabalaod ang pag-amyenda sa Anti-Trafficking in Persons Act nga unang napasar niadtong 2003. Pipila sa mga matang nga idugang mao ang pag-imbestigar ug pag-prosecute sa mga kaso, paghatag og responsibilidad sa mga internet service providers (ISPs), content hosts, ug internet cafes.
Lakip ang tourism-oriented establishments sama sa bangko, credit card and money transfer companies ug mobile payment applications, ug pagpatin-aw sa mga katungdanan sa mga ahensya sa gobyerno sama sa Inter-Agency Council Against Trafficking (IACAT) ug Department of Information and Communications Technology (DICT).
GIPALAPDAN
Gipalapdan sab ang krimen nga ‘qualified trafficking’ ubos sa giduso nga balaodnon sama na lang kon gihimo ang krimen atol sa krisis o katalagman, ang biktima usa ka indigenous person, person with disability (PWD), namabdos ang biktima, ug ang akusado usa ka opisyal sa gobyerno.
Pinaagi sa maong balaudnon, gilaum sa mga organisasyon sama sa CLB ug mambabalaud nga mamenosan pa ang mga kaso sa human trafficking sa atong nasod pinaagi sa pagtinabangay sa mga nagkalainlaing sektor.