Luigi gitudlo ni Duterte nga opisyal sa Tesda

Luigi Quisumbing. (File photo)
Luigi Quisumbing. (File photo)

GITUDLO ni Presidente Rodrigo Duterte si kanhi mayor sa dakbayan sa Mandaue Luigi Quisumbing nga magsilbing deputy director general sa Technical Education and Skills Development Authority (Tesda).

Matod ni Quisumbing sa dihang nahinabi sa Superbalita Cebu, gipahibawo siya sa niaging semana nga gipirmahan na ni Duterte ang iyang appointment.

Gani, paadtuon siya sa kaulohan aron manumpa sa iyang katungdanan ngadto sa Tesda main office sa Taguig kauban si Tesda Secretary Isidro Lapiña.

Gitahasan si Quisumbing nga mopaluyo sa livelihood skills training ngadto sa mga local government unit (LGU) hinungdan nga kanunay siyang mobiyahe sa nagkadaiyang LGU sa nasud.

Matod ni Duterte sa iyang State of Nation Address (Sona) niadtong Lunes, Hulyo 27, 2020, ang livelihood programs labing importante sa mga Filipino karong panahona ilabi na nga daghan ang nawad-an og trabaho ug adunay uban nga “no work, no pay”.

Matod ni Quisumbing, ang iyang katungdanan makaabag sa mga Pilipino nga naglisod karon ug bisan pa man nawad-an sila og trabaho aduna gihapon silay source of income pinaagi sa livelihood programs.

Usa sab sa prayoridad sa presidente nga mahatagan og livelihood programs ang mga repartriated Overseas Filipino Workers (OFW).

“This has resulted in the tremendous lost of income not just sa ilang pamilya but also they are one of the biggest impact in our economy. Now is the time to help our modern heroes,” asoy ni Quisumbing kinsa wa magdahom nga makaserbisyo pag-usab sa kagamhanan.

Iyang gikalipay ang pagsalig nga gihatag sa Presidente ngadto kaniya ilabi nga nga adunay mga maayong plano ang kagamhanan sa pagluwas sa ekonomiya sa nasud pinaagi sa Tesda.

“Maybe because of my experience in the local government and Congress they decided to assign me this particular portfolio,” matod ni Quisumbing. (KFD)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph