SA IKADUHANG adlaw sa pagpanawat og mga aplikante sa contact tracers sa Mandaue City, nakadawat na ang Human Resource and Management Office og 60 ka mga aplikante.
Ang Dakbayan sa Mandaue nangita og dugang contact tracers aron makab-ot ang 593 nga target nga contact tracers.
Aduna pay 200 ka contact tracers nga anaa sa dakbayan.
Matod ni Damaso Tumulak, pangulo sa Human Resource Management Office (HRMO) sa dakbayan sa Mandaue, nga 10 lang ang ningpasa og mga aplikasyon sa ilang opisina samtang ang 50 niini gikan sa online application.
Sagad sa mga aplikante adunay kurso nga Criminology.
Base sa qualification, ang prayoridad nga kurso nga ilang dawaton mao ang mga medikal ug criminology.
Kon mahimo, anaa sab kini usa ka tuig nga experience ug upat ka oras nga relevant training.
Giklaro ni Tumulak nga modawat sab sila og mga aplikante nga nagkurso og Social Work, apan second priority lang kini.
Gipasabot sab ni Tumulak nga gipili kining mga kursoha aron aduna nay igong training samtang nagtungha pa kon unsaon pagpangutana o pag-istorya sa mga pasyente o kadtong mga gi-contact trace. (KFD)