6 ka dapit gi-lockdown, gibuboan dayon og hinabang sa City Hall

GIPABAHAAN dayon og ayuda ang unom ka mga lugar sa lima ka mga barangay human gipatuman sa Cebu City Government ang granular lockdown aron kapugngan ang pagkuyanap sa coronavirus disease (Covid-19).

Kini ang gipahibawo ni Mayor Edgardo Labella subay sa provision sa iyang executive order aron di magutman ang mga tagbalay nga maoy apektado sa lockdown.

“Less than a day after my directive to put six areas in five barangays under strict lockdown, relief goods in the form of rice, canned goods, and other food packs were distributed to the affected families,” matod sa post sa official Facebook page ni Labella.

Si Atty. Junine Aragones, assistant city administrator, nagkanayon nga 443 na ka mga sakong bugas humay nga tag 25 kilos, 544 ka pouch sa gatas, 443 ka putos nga dunay tag usa ka dosenang gamay nga putos sa kape ug 6,645 ka canned goods ang nahatag sa Siyudad.

Si Labella, ubos sa iyang EO, nipatuman og lockdown sa sityo Eyha sa Barangay Guadalupe; Balaga Drive paingon sa sityo Cekalco sa Labangon; Tuada compound sa Tisa; sityo San Isidro sa Quiot, C. Mina extension sa Mabolo.

Si Konsehal Joel Garganera, deputy chief implementer sa IATF-Cebu City, nagkanayon nga aduna pay dugang mga dapit sa mga barangay ang ilang i-lockdown subay sa rekomendasyon sa barangay council gumikan sa presensiya sa virus.

Si, Labella sa iyang bahin, nagkanayon nga kadtong mga balay o compound nga i-lockdown sanglit adunay miyembro sa pamilya nga nataptan sa Covid, abagahon sa Siyudad ang ilang konsumo sanglit di na sila tugtan nga makagawas para mapugngan ang pagpanakod ngadto sa ubang mga tawo.