NANAWAGAN ang Hunta Probinsyal sa Bureau of Internal Revenue (BIR) ug sa Department of Trade and Industry (DTI) sa paghatag og konsiderasyon o di estriktuhon ang pagpatuman sa balaod sa ilang planong pagpaningil og buhis sa gagmay nga mga negusyante, ilabi na sa mga online business ug barter groups.
Kini gipaagi sa usa ka resolusyon “earnestly appealing for leniency and liberality in applying laws on small-time online businesses, exchanges and barter” nga gipangamahanan ni Bokal Glenn Anthony Soco sa sixto distrito.
Ang resolusyon giaprubahan sa Hunta Probinsyal atol sa regular session niini sa Lunes, Hulyo 27, 2020.
Gihimug-atan ni Soco nga ang pagpanikaysikay sa mga Sugboanon sa probinsya gitumong aron makakwarta, resulta lang sa nasinati nga krisis tungod sa coronavirus disease, diin gipatuman ang quarantine restrictions.
Sagad sa mga Sugboanon sa probinsya mihimo og mga pamaagi sa pagpamaligya online sanglit sagad nangawad-an og trabaho.
“From small-time homemade pastries, masks, disinfectants, ornamental plants, ready-to-wear apparel, dry goods, consumables, and many more others are now being traded online. With this, those who are unemployed and are staying at home get to earn a few hundreds of pesos in a day. This sustains those who were displaced due to COVID-19 and an answered prayer for,” matod sa resolusyon.
Nipagawas ang BIR sa Memorandum Circular No. 60-2020 niadtong Hunyo 1, 2020, labot sa mga obligasyon sa tanan nga magnegusyo.
Nalakip na ang pagbayad og buhis sa dili pa ang Hulyo 31, diin kon di gani makatuman sa kamandoan, mag-atubang og silot o penalty.
Pasabot ni Soco nga mas maayo nga suportahan ug giyahan ang mga Sugboanon sa nagkakusog nga palit sa online tungod kay usa kini sa makatabang pag-irog sa ekonomiya sa paagi nga luwas sa pagtakod ug pagkuyanap sa coronavirus disease (Covid-19).
“Support and encourage these small-time online entrepreneurial ventures instead of scaring them off with strong imposing remarks on their strict compliance with the law,” matod sa resolusyon.