NEGATIBO sa coronavirus disease (Covid-19) ang resulta sa RT-PCR o swab test ni Misamis Oriental Gobernador Yevgeny "Bambi" Emano ug Task Force for Covid-19 Chief Dr. Jerie Calingasan.
Ang resulta sa ilang RT-PCR test migawas Martes sa buntag, Hulyo 28.
Ang duha ka opisyales sa probinsya gi-rapid diagnostic test (RDT) Lunes, Hulyo 27, diin migawas usab nga negatibo ang resulta.
Gihimo ang pag-RDT ug pag-swab nina Emano ug Calingasan human nakumpirma nga positibo ang usa ka empleyado sa Kapitolyo ug ang duha ka anak nga lalaki sa lain usab nga empleyado.
Si Emano mao ang secondary contact sa ingon nga mga empleyado.
Sa pagkakaron, anaa sa isolation facility ang duha ka empleyado sa kapitolyo, matud ni Emano.
Samtang, ang Northern Mindanao nakatala sa 30 ka mga bag-ong kaso sa Covid-19 Hulyo 27. Ang kinatibuk-ang kumpirmadong kaso sa rehiyon anaa na sa 480.
Sa 30 ka mga bag-ong kaso, usa niini lokal nga kaso nga dunay travel history nga gikan sa Bukidnon, ug 29 niini returning overseas Filipino worker (ROF)/locally stranded individual (LSI) sa Bukidnon (4), Lanao del Norte (5), Misamis Occidental (1), Misamis Oriental (5), Cagayan de Oro (8), ug Iligan City (6).
Ang rehiyon anaa pud 38 ka mga bag-ong Covid-positive recoveries, diin unom gikan sa Bukidnon, 19 gikan sa Lanao del Norte, usa gikan sa Misamis Occidental, tulo gikan sa Cagayan de Oro, ug siyam gikan sa Iligan City.