NAPUHAG sa elemento sa Philippine Drug Enforcement Agency (PDEA-Davao) ang gihimong drug den sa lima ka mga gisuspetsahang pusher alas 10:40 sa gabii niadtong Dominggo didto sa Bongkawil Subdivision, Barangay Sto. Niño, Panabo City, Davao del Norte.
Sumala sa PDEA-Davao nga subject nila sa buy-bust operation mao si Jeffrey Doromal, drug den maintainer ug maoy number 13 sa City Target List Drug Personality sa Panabo City, ug si Ruby Ann Doromal, ingon man ang usa sab ka Sheryl Caval.
Atol sa operasyon naa ang duha ka parokyano nga sila Julius Cezar Daiz ug Glenn Esparagoza.
Sa operasyon, nasakmit gikan sa mga dinakpan ang gituohang shabu nga motimbang sa 14 gramos nga dunay street value nga P210,000, marijuana ug nagkadaiyang drug paraphernalia.
Sumala sa Pdea-Davao nga dugay na nilang gipanid-an ang lihok sa duha ka Doromal hinungdan nga mihimo na sila og operasyon.
Ning kasamtangan, mga dinakpan gibalhog sa selda sa Panabo City Police Station samtang giandam na ang kasong pagsupak sa Republic Act 9165 kun Comprehensive Dangerous Drugs Act of 2002 nga ipasaka kanila didto sa korte. (JPC)