NAMATAY ang usa ka lalakeng menor de edad nga nagmotorsiklo human siya nalatayan sa usa ka sakyanan alas 9 sa Miyerkules sa buntag, Hulyo 29, sa may national highway sa Barangay Tubod, lungsod sa Sibonga.
Si Nestor Tolomia Jr. 17, tinun-an sa Grade 10, taga Barangay Can-aga, lungsod sa Sibonga, dead on arrival (DOA) dihang nadangat sa Vicente Sotto Memorial Medical Center (VSMMC).
Nitahan sa kapulisan si Ignacio Gomez Potrido Jr., 57, minyo, negusyante, taga Barangay Basdiyot, lungsod sa Moalboal.
Si Police Senior Master Sergeant Reynaldo Celebrado sa Sibonga Police Station nga nahinabi sa Superbalita Cebu nagkanayon nga asi Tolomia sakay sa iyang Rusi nga motorsiklo padulong sa Poblacion, Sibonga.
Si Potrido, sakay sa iyang Isuzu Hilander (GKZ 652) gikan sa Barangay Abugon, Sibonga nangumprag kaang ug padulong mopauli sa lungsod sa Moalboal.
Sa pag-abot sa maong dapit, si Tolomia nga giingong kusog nga nakapadagan sa iyang motorsiklo nga nagdulhog sa kurbadang karsada, kalit nga na-slide.
Didto siya mapasok sa atubangan sa sakyanan sa negosyante, hinungdan nga nalatayan.
Sa kakusog sa impact, nakaangkog grabing kadaot sa ulo ug kalawasan si
Tolomia.
Si Celebrado niingon nga nadali unta sa pagdala sa ambulansiya si Tolomia ngadto sa VSMMC, apan DOA gihapon.
Si Celebrado nibutyag nga ang amahan sa biktima mga si Nestor Sr. mitug-an nga iyang gisugo iyang anak sa paghatud og pagkaon sa igsuon niini nga napriso sa Sibonga Police Station gumikan sa kasong murder.
Si Tolomia nagdali-dali kini unya dangog ang karsada hinungdan nga nadisgrasya.
"Naay siyay helmet nga gidala pero wala gisul-ob, igo ra gibitay sa manobila. Unya kusog sab kaayo nakapadagan," dugang ni Celebrado.
Kagahapon sa hapon, si Potrido ilang gi-release human nagkasabot sa pamilya ni Tolomia nga abagahon ang gasto sa pagpahiluna sa lawas. (GPL)