"AYAW pagpangutana unsay mabuhat sa imong nasud para sa imo, pangutana unsay imong mabuhat alang sa imong nasud,” (Ask not what your country can do for you, ask what you can do for your country) — Pres. John F. Kenedy
Daw walay katapusan ang mga pagbatikos kung kinsa man ang nagalingkod sa trono sa Presidente sa atong nasud.
Sa pagsugod ni President Rodrigo Duterte sa paggunit sa renda sa gobyerno, daw naa siya sa kahitas-an nga ginahangad sa katawhan uban sa paglaum nga mahimo siyang mohatud sa dakong kausaban ug magadala sa pakigdaitaron paghiusa sa katawhan.
Paglabay sa pila ka bulan nag inanay pagkahilis ang katawhan nga nagpalibot ug ang uban namalik sa kadalanan, nanghimaraot sa kagamhanan ug nagsunog sa iyang hulagway human sa ilang pagsinggit sa mga pulong sa pagsaway.
Ang giidolo nga kanhi mayor sa Dakbayan sa Davao ug nahimong presidente sa nasud, usa na kuno ka salot sa katawhang Pinoy nga angayan paphaon gikan sa iyang lingkuranan.
Dili kini bag-o nga mga pulong o mga linya nga mabasa sa mga placards ug mga streamers panahon sa mga rally nga makita sa kadalanan.
Sa hanay sa mga kaatbang sa administrasyong Duterte, wala na tay mapaabot nga mga pagdayeg tungod alang kanila tanan nga ginabuhat sa pangulo pulos walay ayo, labi na karon nga daghan ang naapiktuhan tungod sa pandemya sa Covid-19 ug pagpasirado sa ABS-CBN.
Tibuok nasud ang nag-antus sa pandemya nga nagdala sa mga datu ug kabus sa pareha nga kahimtang kay bisan pa ang daghan og gitaguan nga bahandi nahimong kinulong sa ilang mga balay sama sa kahimtang sa mga kabus.
Ang mga adunahan nga nasud apektado ang tanang kalihukan, sila sab nag-antus sa balatian nga dili mapugngan ug nagpaabot sama nato nga unta duna nay tambal nga ikadapat aron maluwas ug mapanalipdan ang katawhan gikan sa kamatayon.
Kon gilugwayan ang prangkisa sa ABS-CBN, mokunhod ba kaha ang mga apektado sa Covid-19 sa atong nasud? Nigamay ba kaha ang nangamatay? Kon nipatoo ang katawhan nga dili maglatagaw, magpuyo sa balay kay naay virus, dunay posibilidad nga mas ubos ang ihap sa mga biktima apan unsaon nga gahi man og ulo ang katawhan.
Daghan ang nag-rally kay gusto ibalik sa ABS-CBN, supak sa Anti-terrorism Bill. Unya mosinggit pa nga inutil ang gobyerno kay walay nahimo sa Covid! Wala makatabang sa katawhan? Unsa nalang kaha kung gipasagdan sa hingpit sa gobyerno ang katawhan? Sa mga nanaway, kung kamo ang naa sa pwesto, unsa man ang inyong buhaton aron pagsulbad sa sitwasyon?
Ang tanang pagbasul ginalabay ngadto kang Duterte apan duna pay daghang mga tinaguan ang gina-utingkay sa mga sakop sa Kongreso sa umaabot nga mga adlaw.
Maka paabot ba ta nga ang mga kaatbang moingon anang panahona nga husto ang gibuhat ni Digong? Kon sa atong pagpanaway nga walay nabuhat nga maayo ang presidente alang sa nasud, unsa man pud ang atong ikatampo sa atong nasud?