DAVAO DEL SUR -- Gipasigarbo sa 73rd Infantry Battalion (IB) sa Philippine Army ang pagtahan sa duha ka sakop sa New People's Army (NPA) niadtong Biyernes, Hulyo 24, 2020.
Gibutyag ni Lieutenant Colonel Ronaldo Valdez, pamuno sa 73rd IB kagahapong adlawa, mga nitahan mao ang magtiayong alyas Dan ug Ana, kinsa maoy lecturer ug medical officer sa walhong kalihukan ilawom sa Platoon Central sa Guerilla Front TALA Far South Mindanao Region ug mga molupyo sa probinsiya sa Sarangani.
Matud ni Valdez nga nahitabo ang pagtahan sa magtiayon human unang misurender kanila ang uban pang kumander sa NPA.
Mitug-an sab ang magtiayon ngadto sa 73rd IB nga wa na magsinabtanay ang mga sakop sa ilang hut-ong sanglit managlahi ang tribu niini mao nga gilauman ang dunay "mass surrender" sa mga mosunod pang adlaw.
Gitataw ni Valdez nga tinguha sa magtiayon nga makabaton na sila og anak diin dugay na nilang pangandoy sa kinabuhi.
Sumala pa nga lisud kining mahitabo kung magpabilin sila sa komunistang kalihukan sanglit way ayong padagan ang balaod sa teroristang grupo.
Samtang giawhag ni Valdez ang uban pang sakop sa teroristang grupo nga mokanaug na lang sa kabukiran aron makabenepisyo sa mga programa nga giandam sa gobyerno kanila.