DIGOS CITY -- Wa gilung-an sa kapulisan ning dakbayan ang pagpanakop sa mga indibiduwal nga milapas sa minimum health protocols nga gipatuman taliwa sa kampanya batok pandemya sa coronavirus disease (Covid-19).
Sa gipatumang "Oplan Patagam" sa mga sakop sa Digos City Police Station (DCPS) niadtong Martes, Hulyo 28, mokabat sa 30 ka mga tawo ang nasignit.
Sagad sa ilang bayolasyon mao ang wa pagsul-ob og face mask, milapas sa social distancing ug laing 33 ang na-isyohan og citation tickets ug Temporary Operator's Permit sa Land Transportation Office human milapas sa balaod trapiko ilawom sa Republic Act 4136.
Gibutyag ni Lieutenant Colonel Vici Anthony Tababa, hepe sa DCPS, nakatutok karon ang ilang buhatan sa implementasyon sa "Oplan Patagam" nga istriktong gipatuman sa kadalanan.
Matud ni Tababa nga anaa pa sa modified general community quarantine ang dakbayan mao nga kinahanglang motuman sa mga protocol aron di mokuyanap ang sakit.
Niadtong Lunes, 28 ka mga malapason sa protocol ang nasikop samtang 35 ang milapas sa balaod trapiko.