LIMA ka pulis sa Davao City Police Office (DCPO) kinsa nasusi nga positibo sa Sars-Cov-2 nakarekober na.
Gibutyag ni DCPO Director Kirby John Kraft nga ang lima sa unang walo nga nakompirma nga positibo sa kaso sa Covid-19 niadtong Hulyo 21, nagnegatibo na sa kagaw.
Hinuon, iyang gitin-aw nga wala pa nila madawat ang kompletong mga resulta sa ikaduhang batch o 240 ka mga security personnel kinsa gipailawom og swab tests niadtong Hulyo 22.
"We are still waiting for the final result. Yung others, I cannot give details because of privacy and confidentiality," tug-an sa opisyal.
Giklaro hinuon niya nga tanang uban pang mga personahe kinsa gipa-swab test naglakip sa uban pang ahensiya sa kagamhanan nga naa sa Camp Domingo E. Leonor sama sa Philippine Drug Enforcement Agency, National Intelligence Coordinating Agency, Police Security and Protection Group, Philippine National Police (PNP) Anti-Cybercrime Group ug PNP Anti-Kidnapping Group.
Kahinumdoman nga ang unang nagpositibo sa Covid-19 sa DCPO mao ang usa ka sakop sa Special Weapons and Tactics Motorcycle Quick Response Team kinsa nadestino sa Barangay 23-C sa dihang gipailawom kini ubos sa lockdown.
Tungod niini, napugos ang DCPO nga isirado ang ilang compound ug gipailawom sa swab test ang ilang mga personahe.
Gimandoan ni Kraft ang iyang mga kapulisan nga nadestino sa mga Very High Risk ug High Risk areas nga padayon nga mosunod sa minimum health standards.
"They have to wear a face mask and face shield, to observe physical distancing, and to always carry alcohol for disinfection," tug-an niya.