NADASIG ang mixed martial arts (MMA) promoter sa Sugbo nga si Master Benigno ‘Ekin’ R. Caniga Jr. sa Yaw-Yan Ardigma Cebu sa pagkaaktibo og balik sa ONE Championship taliwala sa padayong hulga sa coronavirus disease 2019 (Covid-19).
“We are proud gyud sa ONE Championships sa promotion nila, the biggest MMA promotions sa Asia. Happy kaayo ko nga nabalik na ang MMA event kay lisod sad kaayo og lihok kami nga stakeholder sa MMA,” matod ni Caniga sa pagpakighinabi ning mantalaan.
“Dako og purohan nga makabalik nami sa training ug promote sa MMA dri sa Cebu puhon.”
Si Caniga ug ang Yaw-Yan Ardigma Cebu adunay duha ka fighters sa One Championships nga sila si Roel “Aki” Rosauro ug Allan Albindo.
“Hoping ta nga maka-train na sila og balik. Halos tanan MMA gym dri sa Pilipinas proud kaayo nga nabalik ang ONE Championship sa event nila since nga giatubang nato nga pandemic,” dugang ni Caniga.
Ang ONE Championship, nga nagbasi sa Singapore, mopahigyon og event nga giulohan og ONE: No Surrender karong Hulyo 31, 2020 sa Bangkok. Thailand.
Mao kini ang unang promosyon sa ONE sukad miigo ang Covid-19 pandemic sa tibuok kalibutan ug naka-apekto sa sporting scene.
Sa main event, modepensa si Rodtang Jitmuangnon sa iyang ONE flyweight Muay Thai World Championship batok kang Petchdam Petchyindee Academy.
Ang Filipino-Kiwi fighter nga si Mark Abelardo nalakip sa card ug makigbatok kini kang Brazilian Fabricio Andrade sa 67 kgs. catchweight.
Naatol ang pagbalik sa ONE Championship sa ilang pagpirma og multi-million deal nga kontrata sa Cignal TV. Makita na kini sa Philippine television pinaagi sa One Sports+ o TV5 channels.
Ang ONE Championships kanhi gisalida sa ABS-CBN Sports & Action apan wala na nakakuha og bag-ong prankisa gikan sa Kongreso ang maong TV network.
“Ang ONE mo-tie up gyud na sila sa dagkong TV network diri sa Pilipinas kay daghan naman kaayo ang nahilig sa MMA diri sa atoa,” matod ni Caniga.