NAGLUMBAANAY na ang pagpangatagak
sa dahon sa mahogany nga gapauraray
sa hadla sa hangin. Tin-aw nga miabot na
ang ting-init. Maaninag pod ang paghubas
sa sapa sa mga dahon nangsal-ot
sa mga nangliking yuta nga agianan sa tubig.
Napawot ug nabantok na ang daruhan
ni Lolo Ingkoy dala’s dagan-dagan
sa mga batang gapalupad sa ilang mga tabanog.
Ug kon moadto kag baybayon, makita nimo
ang kainit nga nanamin sa mga panit
sa mga langyaw nga nagtampisaw daplin
sa dagat. Samag kabaw nga dili na hapit
moundang og humol sa tunaan samtang
gikanta-kantahan sa mga pakrang nanlimbasog
og kumpayot sa buko-buko niini.