NAKAHINUMDOM ko niadtong dekada `70 basta Dominggo na sa gabii halos ang tanan nakatutok na sa ilang tagsa-tagsa ka mga radyo aron maminaw sa nabantog nga dyRC Amateur Hour Singing Contest o kundi man gani motan-aw gyud sa linawas sa dihang naa pa ang karaang dyRC sa may Osmena Boulevard duol sa Cebu Doctor’s Hospital.
Usa sa mga nagpasikat sa maong tulumanon mao ang makalingaw nilang mga emcee nga maora sad og artista sa Manila ang popularidad ug usa niini si Baby Condeno nga teenager pa lang niadtong higayona.
“Nag-start sad ko sa singing contest sa dyRC Children’s Amateur Hour when I was 10. Then gikuha ko as co-emcee ni Uncle Jess Saclo sa Wee-Wee Jamboree in 1975. Duna say noontime show sa dyRC, “The Entertainers” from Monday thru Saturday hosted by Uncle Ramonito del Rosario, Tito Art Maloy and uncle Stacs Huguete nga puros mga nitaliwan na intawon. It so happened nga nasakit si Uncle Stacs, maong gi-train ko nila ni Uncle Ram and Tito Art as host and co-emcee sa The Entertainers and DYRC Amateur Hour every Sunday evening with the late Maestro Mil Villareal (musical director/pianist). Three hours live show straight from 6-9 p.m,” paambit ni Condeno nga nagselebrar sa iyang ika-61 nga kasumaran niadtong Hulyo 4.
“Na-champion pud ko sa Channel 9 sa `Kaplag Sa Bitoon.’ Dinhi ko na-discover sa `Maria Flordeluna,’ where I played the title role. I was only 13 and that was my very first Visayan movie.”
Lakip sa iyang mga nahimong pelikula ang “Battle of Mactan” kauban si Chanda Romero, “Paypay Placid” ug “Sa Imong Lawas ug Dugo” (lead role). Nigawas usab siya sa ABS-CBN teleserye nga “Friends 4 Life” ug sa “Mipahiyom ang Langit” sa CCTN Channel 47 niadtong 2004. Nahimo siyang kandidata sa 1974 Miss Cebu nga gipahigayon sa Cebu Coliseum ug sa 1975 Miss Mandaue diin pareho siyang nidaug nga Best in Talent.
Nagsugod si Baby og kanta isip propesyonal tuig 1977 sa Baseline Restaurant, dayon sa El Refresco Bar, Villame Restaurant, Lawiswis Kawayan, Rajah Hotel, Slabadu, Aninipot Bar, Royal Pub Ranudo, Kings Tavern, ug Starfield Piano Bar.
“Pero during that time on and off ko sa dyRC as co-host kay nag-singer man ko sa Japan from 1982 to 2002,” balik-lantaw pa ni Baby.
“Forever grateful ko with my mentors, nilang Uncle Ramonito ug Tito Art kay sila gyud ang nag-train nako para makahibawo ko motabi kay mauwawon kaayo ko sa una. Na-confident ra ko tungod nila. Dire sad ko naila nga Baby Condeno. My real name is Luzviminda Condeno.”
Ang labing dugay niyang puwesto ang Jazz ’n Bluz sud sa 13 katuig (2004-2017) samtang ang pinakauwahi niya ang Jazz Chillin Restaurant apan tungod sa pandemic kasamtangan siyang na-estambay karon. Baby Condeno, Ssssuper Ka!
Naa pa kay contact sa mga kauban nimo sa una?
Oo, naa mi grupo nga D’CEACORP Inc. nga ang mga miyembro mga kauban nakong singers sa dyRC, ug ang ilang mga kids apil sad namo. Ako ang presidente. Naa pa koy laing duha ka grupo nga puros ako say vice president: ang Curta Corp. nga ang mga miyembro taga-radyo ug TV; ug ang BMS-Beteranong Musikero sa Sugbo.
Taga-asa inyong kagikan?
My Father is from Bicol, Pandan Catanduanes. My mom is from Carcar, Cebu. I have 3 sisters and 5 brothers. I’m the eldest.
Sayo diay ka nag-showbiz?
Yes, pero scholar ko sa UV from high school to college. I took up Business Ad.
Kon duna kay gustong balikan sa una unsa ni?
Ang akong pag-biyahe abroad kay nakatabang ni nako ug sa akong family. If given the opportunity ug mo-open na og balik ang mga establishment, I would love to go back to singing. Kay mao ni nakapaguwapa nako and nakapa-inspired. Singing is the love of my life. I’m happy to meet friends from all walks of life. Maybe someday makahimo pod ko og gamay nga negosyo para maka-survive for my daily needs.
Wala kay nadawat nga ayuda?
Sa tinuod lang, wala gyud ko kadawat og ayuda gikan sa gobyerno nga kinahanglan pud unta nako as a single parent and a senior citizen. Especially this time nga close ang mga bar nga mao untay akong bread and butter. Salamat nga naka-survived gihapon with the help of my one and only child ug sa iyang family. She’s happily married with 4 children (2 boys and 2 girls). Sa pagkakaron nag-stay ko nila sa Talamban but I live in Guadalupe. Sila ang nag-provide sa akong medicine, food and shelter.
Unsa ray lingaw nimo karon?
I’m happy with my grandchildren kay ako may tig-prepare sa ilang food kay dili man lagi kagawas kay ECQ. Watch og K drama sa Netflix. Usahay mag-estorya mi sa akong mama ug mga igsuon sa telephone. I want to inspire people and be a good role model to the younger generation. I hope people would remember me as one of the pillars in the local entertainment industry. I’m always proud to be a Cebuana.